Diyor Imomxo'jaev "Neftchi" va "Dinamo" haqida fikr bildirdi

"Pro liga g'olibligi uchun o'tgan Neftchi — Dinamo o'yini xursand qildi.

Birinchidan, har ikki klub Superliga yo'llanmasini qo'lga kiritgan bo'lsa ham, oxirigacha kurashdi, hech kim o'yinni tashlab yubormadi. Temp jihatdan kecha Superliga o'yiniga guvoh bo'ldik.

Ikkinchidan, mezbonlar uchrashuvga yaxshi tayyorgarlik ko'rgan. Biz bugunga kelib Pro liga g'olibi bo'lish zavqini ham oshira oldik. Katta-katta viloyatlar buni katta bayram va quvonch bilan qarshi olishi yoqimli.

Uchinchidan, Pro liga klublari g'urur uchun o'ynashni boshlagani yaxshi. Dinamo ham faqat Superliga bilan cheklanmadi, balki Pro liga g'olibligi uchun borini berdi — bu progressdan dalolat.

To'rtinchidan, Superliga yo'llanmasi bilan ikki katta viloyat hokimlari bevosita tabrik yo'lladi. Samarqand viloyati hokimi o'z jamoasini feysbuk orqali qutladi, Farg'ona viloyati hokimi o'z jamoasi bilan bayramni nishonladi.

P.S. Aynan Neftchi va Dinamo klublari OFK litsenziyalash talablarini bajarish arafasida turibdi. Unutmaslik kerakki, tarixda quyi liga klublari bunday litsenziyaning yaqiniga ham kela olmagan. Biz bu yil plankani biroz ko'tarishga yaqin turibmiz", - dedi Imomxo'jaev telegram sahifasida.