O'FA birinchi vitse-prezidenti Ravshan Ermatov raisligida yig'ilish bo'lib o'tdi

Bugun O'FA birinchi vitse-prezidenti Ravshan Ermatov raisligida hududlarda futbolni rivojlantirish bo'yicha olib borilayotgan ishlar va mavjud kamchiliklarni tahliliga bag'ishlangan yig'ilish bo'lib o'tdi.

Videoanjuman shaklida o'tkazilgan yig'ilishda hududiy futbol assotsiatsiyalari vitse-prezidentlari va bolalar-o'smirlar futboli bo'yicha mas'ul mutaxassislar ishtirok etishdi.

Kun tartibiga ko'ra, dastlab viloyat terma jamoalari o'rtasida bo'lib o'tayotgan O'zbekiston chempionatining tahlili bilan tanishildi. O'FA rahbariyati tashkilotchilik ishlari, futbolchilar uchun yaratilgan shart-sharoitlar va turar joy masalasi, ovqatlanish, ekipirovka, jihozlar, shuningdek, futbolchilarni elektron ma'lumotlar bazasiga joylashtirish jarayonini tanqidiy tahlil qildi.

Kelgusi musobaqalarga tayyorgarlik ko'rish va yuqori darajada o'tkazish bo'yicha fikr almashildi. Tashkiliy masalalar, xususan, turar joy, stadionlar, hakamlik, sanitariya, xavfsizlik va yana bir qator yo'nalishlar yuzasidan tegishli qarorlar qabul qilindi va mas'ullar belgilab olindi.

Shuningdek, O'FA birinchi vitse-prezidenti murabbiylar bilan suhbatlashib, hududlarda terma jamoalar uchun mahoratli futbolchilarni etishtirib berishda, eng avvalo, ularning o'rni katta ekanligini, murabbiylar ham doimiy ravishda o'z ustida ishlashi va malakasini oshirib borishi kerakligini ta'kidladi.

Yosh tarbiyalanuvchilarning o'sish dinamikasini monitoring qilish va bu orqali aniqlangan kamchiliklarni bartaraf etib, mashg'ulotlar jarayonini ilmiy yondashgan holda tashkil etish bo'yicha tegishli tavsiyalar berildi.

Bundan tashqari, kuz-qish mavsumida akademiyalar, yotoqxonalar, sinf va mashg'ulot xonalarini isitishni tashkil etish bo'yicha mas'ullarga topshiriqlar berildi.