Faxriylar o'rtasidagi O'zbekiston kubogi sovrindorlari aniqlandi

Jizzax viloyati mezbonlik qilgan 40 yoshdan katta bo'lgan futbolchilar o'rtasidagi O'zbekiston kubogining hal qiluvchi o'yinlari bo'lib o'tdi.

Dastlabki bahs «Toshkent» hamda «Navoiy» jamoalari o'rsatida 3-o'rin uchun kechdi. Tengma teng kurashlar ostida kechgan uchrashuvning asosiy bo'limlarida g'olib nomi aniqlanmadi. Shundan keyin penaltilar seriyasiga murojaat qilindi. Unga ko'ra, omad «Toshkent» jamoasiga kulib boqdi, 5-4.

Final uchrashuvida esa «Jizzax» va «Qo'qon» jamoalari kuch sinashishdi. Mazkur bahsda mezbonlar Ulug'bek Baqoevning kiritgan goli evaziga g'alabani qo'lga kiritib, turnir chempioniga aylandilar.

Final uchrashuvidan so'ng taqdirlash marosimi bo'lib o'tdi. Unda O'FA birinchi vitse-prezidentining maslahatchisi Rahmiddin Zikriyoev, O'FA faxriylar kengashi raisi To'lagan Isoqov, O'FA hududiy futbol assotsiatsiyalari bilan ishlash bo'limi boshlig'i Baxtiyor Shirinov, «So'g'diyona» klubi prezidenti O'ktam Mahmudjonov, shuningdek, keng jamoatchilik vakillari ishtirok etishdi.

Musobaqaning g'olib va sovrindorlarga esdalik sovg'alari topshirildi.