Millatlar ligasi finali qiziqarli to'qnashuvmi?

Bir qaraganda, oddiy Millatlar kubogi finali, lekin o'yindagi kuchlar muvozanatini nazarga olsak, ancha qiziq to'qnashuv.

Sababi. Futbolda azaldan ikki maktab bor. Yulduzlarga moslashtirilgan taktika yoki taktikaga xizmat qiladigan ijrochilar... Murabbiylar va jamoalar ham mana shu ikki yo'nalishga bo'linadi. Bir tarafda Kroyf, Gvardiola, Tuxel, Klopp, ikkinchi tomonda Fergyuson, Anchelotti, Zidan, Sulsher... Bir tomonda "Real", "MYu", "PSJ", ikkinchi tomonda "Siti", "Chelsi", "Bavariya".

Bilasizmi, xuddi klublar futboli singari, milliy jamoalarda ham o'yin qurishga sistematik murabbiylar paydo bo'ldi va mana shunday murabbiylik jamoalari ichidagi eng yorqin va balki kuchli namuna — Ispaniya.

Frantsiya esa, teskari g'oyani targ'ib qiladi, boshqacha bo'lishi mumkinmas, zero ayni paytda dunyoda eng yulduzli jamoa aynan Deshamda. Benzema, Mbappe, Pogba, Grizmann, tabiiyki, ularni bir tizimga moslash mumkinmas, tabiiyki har qanday murabbiy o'yinini ushbu yulduzlarning ustunlik va kamchiliklari asosiga quradi.

Qizig'i, ispanlar yarim finalda xuddi o'ziga o'xshagan sistematik jamoa bo'lmish Italiyani, frantsuzlar esa, boshqa bir yulduzli tarkib — Belgiyani engishdi. Ya'ni har qanday holatda ham biz mana shu azaliy savol, sistema va ijrochilar o'rtasidagi masalani guvohi bo'lardik.

Bir o'yin, albatta, yakuniy xulosani bermaydi, ammo navbatdagi to'qnashuvni kuzatish, ikki g'oya o'rtasidagi farq va bu safar ham, qanday qilib sistema yulduzlarni soyada qoldira olishi yoki aksincha, ijrochilar sistemani parchalashi mumkinligini kuzatish maroqli.

Siz qaysi tomondasiz?

Qahramon ASLANOV.

Manba: https://t.me/asl_futbol