Ronaldu Qatar ustidan qozonilgan g'alabadan keyin nimalar dedi?

36 yoshli «Manchester Yunayted» va Portugaliya terma jamoasi hujumchisi Krishtianu Ronaldu o'rtoqlik uchrashuvida Qatar ustidan qozonilgan g'alabaga (3:0) haqida ijtimoiy tarmoqlarda o'z postini e'lon qildi.

«Men har doimgidek o'z vatanim sharafini himoya qilayotganimdan faxrlanaman. Yana bir sinov, tarixiy orzu - 2022 yil Qatarda bo'ladigan jahon chempionatida o'ynashning ulug'vor va mustahkam yo'lida birdek harakatdamiz!» - deya Ronaldu Instagramda post qoldirdi.

Eslatib o'tamiz, Qatar bilan uchrashuv portugaliyalik uchun terma jamoa libosidagi 181-uchrashuv bo'ldi va bu Ronalduni Evropa jamoalari orasidagi rekordchiga aylantirdi.

Krishtianu Ronaldu Portugaliya terma jamoasi safida 181 o'yinda 112 gol va 41 golli uzatma muallifi bo'lgan. Terma jamoa tarkibida u 2016 yilgi Evropa chempionatida oltin, Evro -2012da bronza va Evro-2004da kumush, 2019 yilda UEFA Millatlar ligasida g'oliblikni qo'lga kiritdi.