Nukusda aralash jang san'atlari bo'yicha Markaziy Osiyo chempionati o'tkaziladi

Xabar berganimizdek, 9-10-oktabr kunlari Qoraqalpog'iston Respublikasining Nukus shahri aralash jang san'atlari bo'yicha havaskorlar o'rtasida birinchi marotaba o'tkazilayotgan Markaziy Osiyo chempionatiga mezbonlik qiladi.

Ma'lumki, 2020 yil 9 fevralda Markaziy Osiyo aralash jang san'atlari Konfederatsiyasi (CAMMAC)ga asos solingan edi. Ertaga ilk marotaba start oladigan chempionat aynan CAMMAC, Xalqaro aralash jang san'atlari federatsiyasi va O'zbekiston jang san'atlari assotsiatsiyasi bilan hamkorlikda tashkil qilinmoqda.

Tabiiyki, turnirda ushbu tashkilotga a'zo 5ta mamlakat vakillari ishtirok etadi. Bular – O'zbekiston, Qozog'iston, Qirg'iziston, Tojikiston va Ozarbayjon aralash jang san'ati ustalardir.

Bugun ushbu musobaqaga bag'ishlab Nukus harbiy garnizonidagi madaniyat saroyida matbuot anjumani tashkil etildi. Unda tashkilotchilar OAV xodimlarini qiziqtirgan savollarga atroflicha javob berishdi.

Shuningdek, matbuot anjumanida musobaqaning faxriy mehmoni – Xalqaro aralash jang san'ati federatsiyasi prezidenti janob Kennit Braun so'zga chiqib, chekka-chekka xududlarda ham sport turlariga berilayotgan e'tibor, sportchilar uchun yaratilayotgan sharoitlar tufayli bugungi kunda xalqaro maydonlarda o'zbek sportining nufuzi ortib borayotganligi haqida iliq fikrlar bildirib o'tdi.

Ertaga, 9 noyabr kuni Markaziy Osiyo chempionati boshlanadi. Unga ko'ra, sportchilar 52.2 kg, 56.6 kg, 61.2 kg, 65.8 kg, 70.3 kg, 77.1 kg, 83.9 kg, 93 kg, 120 kg hamda 120 kg.dan yuqori vazn toifalarida saralash bahslariga kirishadi. Musobaka Nukus shahridagi 1-sonli bolalar va o'smirlar sport maktabiga qarashli «Manej» sport majmuasida o'tkaziladi. Janglar har byuiri 3 daqiqadan iborat 3 raund davom etadi. Birinchi Markaziy Osiyo chempionatining tantanali ochilish marosimi ertaga soat 18:00da boshlanadi.

Musobaqada O'zbekiston terma jamoa sharafini Humoyunshoh Zokirov, Behruz Isroilov, Husniddin Sattorov, Shukurullo Rustamov, Behruz Akbarov, Munis Mo'minjonov, Ikrom Erjanov singari jami 20 nafar havakor sporchilarimiz himoya qilishadi.