Viktor Jalilov: «Afsuski, mashg'ulotda ishlagan rejalarimiz o'yinda ish bermayapti»

Superliga 20-turidan o'rin olgan "Navbahor" — "Qizilqum" uchrashuvidan keyin o'tkaziladigan matbuot anjumanining ikkinchi qismida "Navbahor" bosh murabbiyi Viktor Jalilov qatnashadi.

— Har ikki jamoa bir-biriga munosib ekanligini, teng kuchga ega ekanligini ko'rsatdi. Shu bois, gollar ko'rmadik. "Qizilqum"da ham, bizda ham 100 foizli vaziyatlar bo'lmadi. O'ylashimcha, durang adolatli bo'ldi. Bugun hech kim g'alabaga munosib emasdi. Garchi har ikki jamoa astoydil kurashgan bo'lsa ham. Birinchi davrada ham ular bilan tengma-teng o'ynab, durang qayd etgandik. Faqat bugun hujumda konstruktivlik etishmadi, — deydi Viktor Jalilov.

— Mashg'ulot va o'yin boshqa-boshqa narsalar. Mashg'ulotlarda rasmiy o'yinlardagi kabi qarshilik bo'lmaydi. Afsuski, mashg'ulotda ishlagan rejalarimiz o'yinda ish bermayapti. O'ylashimcha, qaerdadir hujumda mahorat etishmayapti. So'nggi nuqtani qo'yadigan futbolchi etishmayapti.

— O'rinboevdan avval birinchi davrada legioner o'ynadi. Albatta, muxlislarni ham, bizni ham hujumchining bunday o'yini qoniqtirmayapti. Lekin vaziyat shuni taqozo etyapti. Futbolchilarning bor mahoratini ko'rsatishi uchun astoydil harakat qilyapmiz, hujumlarni ijobiy yakunlaydigan futbolchi etishmayapti.

— Turnir jadvaliga nazar solsak, yuqori o'rinlar uchun imkoniyatimiz saqlanib turibdi. Zichlik kuzatilmoqda jadvalda. Yakunda kim kuchli bo'lsa, o'shalar yuqori o'rinlarni egallaydi. Buni futbolchilar ham tushunib turishibdi. Oxirigacha kurashamiz.

— Bizda nafaqat hujumchi, balki hujumkor futbolchilar etishmayapti. Bu masalani ijobiy hal qilish bo'yicha ish olib borilyapti. Keyingi yilga yaxshi o'yinchilar sotib olishga harakat qilinyapti. Umuman, hozirdan keyingi yil to'g'risida gapirish noto'g'ri, — deya fikrlarini yakunladi Viktor Romanovich.

Manba: pfcnavbahor.uz