Prof boks. Eng og'ir toifa. Usik Joshuani mag'lub etib, chempionlik kamarini qo'lga kiritdi (video)

Londondagi «Tottenhem Hotspur» stadionida Toshkent vaqti bilan 25 sentyabrdan 26 sentyabrga o'tar kechasi katta boks oqshomi bo'lib o'tdi.

Musobaqaning asosiy jangida super og'ir vazn toifasida WBA, WBO, IBF va IBO kamarlari sohibi Entoni Joshua (24-2, 22 KO) va Aleksandr Usik (19-0, 13 KO) o'zaro to'qnash keldi.

Ukrainalik bokschi jang davomida to'liq ustunlik qildi. Birinchi raunddanoq ringning "egasi"ga aylandi. Sashaning aktiv harakatlari vaqt poylash yo'lidan boradigan Joshuani shoshirib qo'ydi. Keyingi raundlarda ukrain universallik qo'shdi. Tanaga og'ir zarbalar, oyoq harakatlari, kombinatsiyalar raqibiga tayyorlangan sovg'a edi. Odatdagidek, Joshua jangning o'rtalarida zarbalariga kuch bag'ishlashni boshladi. Yangi chempion boshqa variantlari ko'pligini ko'rsatdi. Aleksandr ikkinchi nafasini ochib olgach bosimni kuchaytirdi. Bahsning boshidan oxirigacha bir xil temp ko'rsatdi.

Hakamlarning hisob-kitobiga ko'ra Usik 117-112, 116-112, 115-113 hisoblarida raqibini mag'lub etdi.