Bahodir Ahmedov: «Barcha imkoniyatlardan foydalana olmaganimiz uchun yutqazdik»

Futzal bo'yicha O'zbekiston terma jamoasi bosh murabbiyi Bahodir Ahmedov Jahon chempionatining nimchorak final bosqichida Eronga qarshi bo'lib o'tgan o'yin (8:9) borasida o'z fikrini bildirib o'tdi.

"Eron — kuchli jamoa. Bu jamoa jahonning eng kuchli 4 terma jamoasi safiga kiradi. Bugun himoyada yo'l qo'ygan xatolarimiz evaziga ko'p gol o'tkazib yubordik. Bundan tashqari, o'zimiz yaratgan barcha imkoniyatlardan ham foydalana olmadik.

Nazarimda, chempionatda yomon ishtirok etmadik. Yanada yaxshiroq natijalar ham qayd etishimiz mumkin edi. Yigitlardan ko'nglim to'q. Biz JChdagi eng yosh jamoalardan biri bo'ldik. Ular keyingi musobaqalarda o'z saviyalarini oshirishiga ishonaman", — dedi Bahodir Ahmedov.