Italiyaning mashhur “Yuventus” klubi o'zbekistonda o'z futbol akademiyasini ochadi

Bugun Jismoniy tarbiya va sport vazirligida Italiyaning “Yuventus” klubining brendni boshqarish va rivojlantirish bo'yicha ijrochi direktori Karolina Kiappero boshchiligidagi delegatsiya bilan uchrashuv bo'lib o'tdi.

Yurtimizga tashrif buyurgan mashhur Italiya futbol klubi vakillari bilan o'tkazilgan muzokaralar jarayonida Turin politexnika universiteti kampusi bazasida “Yuventus akademiyasi”ni tashkil etish bo'yicha muzokaralar olib borildi.

Jismoniy tarbiya va sport vazirligida bo'lib o'tgan uchrashuvda ham tomonlar yurtimizda futbolni ommalashtirish, yangi tashkil etilayotgan akademiya faoliyatini samarali yo'lga qo'yish hamda o'zaro hamkorlikni kuchaytirish masalalarini muhokama qilishdi.

“Serquyosh yurtimizda sizlarni ko'rib turganimda bag'oyatda xursandman. Bizda futbol yaxshi ko'rishadi. Xususan yurtimizda “Yuventus” jamoasi muxlislari ham ko'pchilikni tashkil etadi. Poytaxtimizda ushbu klub akademiyasining tashkil etilayotgani barchamiz uchun quvonchli yangilik bo'ldi. Akademiyaning tashkil etilishi nafaqat ushbu muassasada, balki umuman o'zbek futboliga jahonning ilg'or tajriba va metodikalarini joriy etishi imkonini beradi deb o'ylayman. Vazirligimiz ham o'z navbatida klub bilan hamkorlik qilishga hamda akademiyani har tomonlama qo'llab-quvvatlashga tayyor” – dedi D.Nabiev.

“Yuventus” klubining brendni boshqarish va rivojlantirish bo'yicha ijrochi direktori Karolina Kiappero yurtimizda akademiyani tashkil etishdan maqsad faqatgina uning o'quvchilarini tayyorlash emas, balki o'zbek yoshlariga futbol bilan professional tarzda shug'ullanish imkoniyatini yaratish ekanligini ma'lum qildi.

“Yuventus akademiyasi” faoliyati bolalarning futbol orqali jismoniy rivojlanishiga ko'maklashish, shuningdek ularda futbol madaniyatini shakllantirishga qaratilgan. Akademiya faoliyati kompleks yondashuvga asoslanib, yillik trening, shug'ullanish oromgohi, yozgi oromgoh, o'quv sessiyasi kabi jami oltita asosiy yo'nalishda amalga oshiriladi.

Eslatib o'tamiz, bugungi kunga kelib, “Yuventus akademiyasi” loyihasi Evropa, Osiyo va Amerika qit'asida joylashgan 49 ta mamlakatda amalga oshirilib, 100 dan ortiq hududni va 15000 nafardan ortiq bolalarni qamrab olgan.