PFL so'nggi bir ichida amalga oshirilgan ishlar haqida ma'lumot berdi

Professional futbol Ligasi (PFL) so'nggi bir yil ichidagi o'zgarishlar haqidagi video hisobotni namoyish qildi. Mazkur hisobotda PFLda so'nggi vaqtda ro'y bergan o'zgarishlar sanab o'tildi. Ular ichida ayrim qiziqarli ma'lumot va raqamlarni uchratish mumkin.

Qayd etilishicha, 2021 yilga qadar hakamlar bitta Superliga o'yinini boshqargani uchun 300 AQSh dollari miqdorida gonorar olgan. Joriy mavsumdan bu miqdor 550 dollarga ko'tarilgan. Shuningdek, Markaziy Osiyoda birinchi bo'lib O'zbekiston chempionati bahslarida tatbiq etilgan VAR tizimi xarajatlarini PFL to'liq qoplaydi.

Ayollar va futzal jamoalari shu vaqtga qadar yiliga 50 million so'mdan badal to'lab kelgan. Bu mavsumdan ular badaldan to'liq ozod etilgan. Badal puli Pro-Liga va Birinchi Liga jamoalari uchun 50 foizga, Superliga klublari uchun esa 30 foizga qisqartirilgan. PFL kelajakda badal pullarini to'liq yo'q qilib, klublarni moliyaviy rag'batlantiruvchi tashkilotga aylanishni maqsad qilgani aytilgan.

Ma'lum bo'lishicha, PFL 2020 yil MyCujoo bilan hamkorlikdan 27 ming evro daromad qilgan. Joriy mavsumning birinchi yarmida bu ko'rsatkich 24 ming evroni tashkil qilgan. Shuningdek, tashkilot Superliga va O'zbekiston Kubogi o'yinlaridan qisqa videosharh tayyorlash va namoyish etish huquqini ham sotgan. «Championat.asia» va «Tribuna.uz» saytlarining har biri ushbu huquqni bir mavsum uchun 100 million so'm evaziga sotib olgan.