O'FA rahbariyati futzal bo'yicha O'zbekiston milliy terma jamoasiga tabrik yo'lladi

Futzal bo'yicha O'zbekiston terma jamoamiz tarixiy natija qayd etdi. FIFA tomonidan o'tkazilayotgan Jahon chempionatlaridagi ilk g'alabasini qo'lga kiritdi. Ushbu g'alaba esa guruhda ikkinchi o'rinni egallagan holda Mundialning nimchorak finaliga yo'llanma qo'lga kiritishimizga sabab bo'ldi.

Barcha futzalchilarimiz, murabbiylar shtabi, delegatsiya rahbari, tibbiy shtab, menejer, administrator va media mutaxassislari, shuningdek, jamoamizni Litvada qo'llab-quvvatlayotgan hamda ekran orqali muxlislik qilayotgan barcha ishqibozlarni ushbu g'alaba bilan O'FA nomidan, qolaversa butun futbol jamoatchiligi nomidan tabriklaymiz! O'zbek futboli va futzali uchun bu juda katta g'alaba. Chunki jamoaviy sport turlarida ham eng yuqori darajadagi turnirlarda yuqori natijalar qayd eta olishimizga ishonch ortdi.

Eng muhimi, jamoalarimiz g'alabasini sog'inib yashaydigan muxlislarimizga bayram kayfiyati taqdim etildi. Futzal terma jamoamiz katta yo'lni bosib o'tdi, eng kuchlilar bilan raqobatlashdi, Ispaniya va Portugaliyada o'tkazilgan yig'inlarda tajriba to'plab, tayyorgarlikni yuqori darajaga olib chiqdi. Albatta, biz keyingi bosqichda ham jamoamizga ishonamiz va omad tilaymiz!, deyiladi matbuot xizmati xabarida.