Bahodir Jalolovning jangiga uch kun qolganda raqib o'zgardi

Professional boksning super og'ir (+90,7 kg) vazn toifasida ringga chiqayotgan o'zbekistonlik Bahodir Jalolovning (4-0 4 KO) raqibi jang boshlanishiga uch kun qolganida o'zgardi. Bu haqda GoSport.uz internet-nashri manbalari xabar bermoqda.

Ma'lumotlarga ko'ra, 15 mart kuni unga qarshi kolumbiyalik Santander Silgado (28-6, 22 KO) raqiblik qilishi lozim edi. Ammo Silgado 23 mart kuni amerikalik Chazz Uizerspun (37-3, 28 KO) bilan jang o'tkazish bo'yicha kelishuvga erishdi va Bahodir Jalolov bilan jang qilishdan bosh tortdi.

Endilikda Bahodir Jalolovga boshqa bir amerikalik bokschi Villi Harvey (3-1-1, 3 KO) raqiblik qiladigan bo'ldi. Jang Kaliforniya shtatining Tyustin shahridagi Markoni avtomobillar muzeyi saroyida bo'lib o'tadi.

Eslatib o'tamiz, Bahodir so'nggi marta 2018 yilning 8 dekabr kuni Markus Valentinga qarshi ringga chiqib, raqibini birinchi raunddayoq nokautga uchratgandi.