Og'ir atletikachilarimiz o'quv-yig'in mashg'ulotini Ukrainada davom ettirishmoqda

Og'ir atletikachi o'smirlarimiz Las-Vegasda har tong turli medallar bilan bizni xushnud qilib kelayotgan ayni damda o'quv-mashg'ulot yig'inida yurgan asosiy terma jamoamiz vakillari Bolgariyadan so'ng yana Ukrainaga qaytishdi.

Mazkur yig'in yanvar oyida ushbu mamlakatda boshlanib, 1 oydan so'ng atletlarimiz Bolgariyaga yo'l olishgan edi. Xorijdagi so'nggi yig'inni o'tash uchun delegatsiyamiz yana Ukrainaga qaytib kelishdi.

Tayyogarlik bo'yicha barcha ishlar rejaga muvofiq amalga oshirilmoqda. Sportchilarimiz jismoniy jihatdan optimal holatga kelib bo'ldi, deya olamiz. Aprel oyida Xitoyda bo'ladigan Osiyo chempionati Tokio Olimpiadasiga reyting ochkolarini beruvchi oldindagi eng yirik musobaqalardandir. Shu bois vakillarimiz qit'a chempionatiga maksimal darajada tayyorlanishmoqda.

Polvonlarimiz 29 mart kuni poytaxtimizga qaytib kelishadi va 20 kun davomida Chirchiqdagi bazada Osiyo chempionatiga so'nggi tayyogarlik mashqlarini olib borishadi. Eslatib o'tamiz, mazkur yig'inda 7 sportchi va 4 nafar malakali murabbiy ishtirok etmoqda.