Tennis. Medvedev finalda Jokovichni mag'lub etib, «US open»ni qo'lga kiritdi

Ikki hafta davomida Nyu-York shahrida o'tkazilgan tennis bo'yicha "Ulkan toj" turkumiga kiruvchi US Open turniri Daniil Medvedevning g'alabasi bilan yakunlandi.

Dunyoning ikkinchi raketkasi bo'lib turgan rossiyalik tennischi hal qiluvchi final uchrashuvida sayyoramizning birinchi raketkasi, serbiyalik Novak Jokovichga qarshi kortga chiqdi va uch setda ham bir xil hisobdagi o'zi uchun tarixiy g'alabaga erishdi - 6/4, 6/4, 6/4.

Ikki soatu 17 daqiqa davom etgan finalda 25 yoshli Daniil 4 ta breyk-poynt, 16 ta eys zarbani amalga oshirdi. 34 yoshli Novak esa 6 ta eys zarbani ijro etdi. Tennischilarning o'zaro uchrashuvlarida Medvedev hisobni minimal ko'rinishda qisqartirdi - 4:5.

Shu tariqa, Daniil Medvedev faoliyatidagi ilk "Ulkan toj" sovriniga ega chiqdi. Muvaffaqiyatli ishtirok rossiyalik tennischiga 2,500,000 dollar mukofot puli hamda 2000 reyting ochkosini taqdim etdi. Medvedev bu g'alabasi bilan Jokovichning bir mavsumda to'rtta "Ulkan toj" turniri bosh sovrinini qo'lga kiritishiga to'sqinlik qilib qoldi.

Agar Novak Jokovich finalda g'alaba qozonganida, mavsumdagi barcha "Ulkan toj" turnirlari bosh sovrinini qo'lga kiritar va bu bilan afsonaviy Rod Leyverning natijasini takrorlagan bo'lar edi. Serbiyalikning "Ulkan toj"lardagi chempionlik titullari 20 taligicha qoldi. Aynan shuncha sovringa Rojer Federer va Rafael Nadal ham ega.