JCh-2022 saralash. Braziliya - Argentina o'yini 4-daqiqada to'xtatildi va oxirigacha o'ynalmadi

KONMEBOL mintaqasida Jahon chempionati saralash bosqichidan o'rin olgan Braziliya va Argentina terma jamoalari o'rtasidagi o'yinda kutilmagan holat yuz berdi. Bahs boshlanganidan keyin oradan 4 daqiqa o'tib uchrashuv to'xtatildi.

Boisi, maydonga Braziliya sog'liqni saqlash agentligi vakillari hamda politsiya kirib keldi. Mehmon jamoa futbolchilari esa maydonni tark etishdi.

"Kutilmagan mehmonlar" Argentina terma jamoasining 4 nafar a'zosi — Emiliano Martines, Emiliano Buendia (ikkisi – «Aston Villa»), Jovani Lo Chelso va Kristian Romero (ikkisi – «Tottenxem») qoidaga xilof ravishda kirganini ta'kidlashdi.

Qoidaga ko'ra, Buyuk Britaniyadan Braziliyaga keladigan fuqarolar 14 kunlik karantinda o'tirishi shart. Sog'liqni saqlash xizmatining tasdiqlashicha, yuqoridagi 4 o'yinchi mamlakat migratsiya xizmatiga noto'g'ri ma'lumot bergan. Ya'ni ular so'nggi paytda Buyuk Britaniyada bo'lmaganini aytishgan.

Politsiya vakillari futbolchilarni qo'lga olib mamlakatdan chiqarib yuborish maqsadida Argentina terma jamoasi joylashgan mehmonxonaga borishganida, delegatsiya stadion tomon yo'l olgan bo'lgan.

Martines, Lo Chelso va Romero Braziliyaga qarshi o'yinni boshlang'ich tarkibda boshlashgan edi.

Shu tariqa, o'yin bekor qilindi va boshqa muddatga ko'chirildi. Ushbu voqea yuzasidan yakuniy qaror FIFA tomonidan qabul qilinadi.