Katanets: "Biz yaxshi o'ynadik, lekin xatolarimiz ham bo'ldi"

Bugun O'zbekiston terma jamoasi Xalqaro o'rtoqlik uchrashuvlari doirasida Shvetsiyaga qarshi bahs olib bordi va 1:2 hisobida imkoniyatni boy berdi. Mazkur bahsdan keyin terma jamoamiz ustozi Srechko Katanets jurnalistlar savollariga javob berdi.

Bugungi uchrashuv va ilk taassurotlaringiz haqida nima deysiz?

Eng avvalo, Shvetsiya terma jamoasini g'alaba bilan tabriklayman. Birinchi taassurotimga keladigan bo'lsak, O'zbekistonga kelganimga hali ko'p bo'lmadi. Umuman olganda, bugungi o'yindan qoniqdim. Biz yaxshi o'ynadik, lekin xatolarimiz ham bo'ldi. Bu albatta normal holat. Sababi, tarkibimizda yosh o'yinchilar ko'p edi. O'ylashimcha, shu bilan to'xtab qolmaymiz. Ko'proq ishlashimiz kerak, chunki bizni hali juda ko'p muhim o'yinlar kutib turibdi.

Hammamizga ma'lum, shvedlar ancha yuqori darajadagi jamoa, ular nima qilish kerakligini juda yaxshi bilishadi. Jamoada katta turnirlar tajribasi bor. Bugungi o'yinda ham raqiblarimiz chiroyli o'yin ko'rsatdi. Bizga esa bu uchrashuv katta tajriba bo'ldi.

O'yinning dastlabki daqiqalarida markaziy himoyachilar xatoga yo'l qo'ydi, ularning bugungi o'yini haqida nima deya olasiz?

Bu futbol. Hammamiz ham xato qilamiz. Himoyachilarimiz ham bundan mustasno emas. Ularga qo'yilgan vazifa — agressivroq bo'lish edi. Aslida, men buni hammadan talab qildim. Chunki, o'zbek futbolchilariga bu narsa biroz etishmaydi.

Lekin ta'kidlaganimdek, umumiy natijadan qoniqdim. Shvetsiyadek jismoniy jihatdan kuchli raqibga qarshi o'ynash oson emas.

Men natijadan vahimaga tushmayapman. Sababi, asosiy vazifamiz yoshlarga imkoniyat berib, ularni sinab olish edi, busiz iloji yo'q, chunki biz o'sishimiz kerak.

Eldor Suyunov bugun eng yaxshi o'yinini o'tkazdimi?

Bilmadim. To'g'risini aytsam, bu men uchun muhim emas. Ha, u bugun chiroyli seyvlar qildi.

O'zingizga ma'lum, kuchli jamoa qurish uchun yillar kerak. Men jamoaga qo'shilganimga esa 7 kun bo'ldi. Umid qilaman, hamma o'z ustida ishlaydi va to'xtab qolmaydi. Shvetsiyaga esa keyingi o'yinda omad tilayman.