«Kevo» sobiq darvozaboni: «Ronaldu menga bergan va'dasida turmagan edi»

«Kevo» klubi sobiq darvozaboni Stefano Sorrentino hujumchi Krishtianu Ronaldu bilan bog'liq yuz bergan voqea haqida so'zlab berdi.

2019 yilning 21 yanvar kuni bo'lib o'tgan «Yuventus» — «Kevo» uchrashuvidan (3:0) so'ng portugaliyalik futbolchi darvozabonga o'z futbolkasini berishni va'da qilgan. Ammo o'yin paytida Ronaldu penaltidan yo'llagan zarbani 42 yoshli Sorrentino qaytargan. Bundan jahli chiqqan forvard Stefano bilan futbolka almashishni istamagan.

Oqibatda Sorrentino «Yuventus» hujumchisi Paulo Dibala bilan futbolka almashgan.

«Biz futbolkalarni almashishni kelishib olgandik, ammo u penaltidan gol ura olmagach jahli chiqdi. Italiyada u ilk marta penaltini golga aylantira olmagan edi.

Tunnelda biz uchrashdik, u mening qo'limni siqib tabrikladi, ammo uning yuzi norozi qiyofada edi. U menga o'z futbolkasini bermadi», — dedi Sorrentino.