Tokio-2020: Dzyudo. Sherzod Namozov bronza medali uchun kurashda yutqazdi

Hozirgina Tokio-2020 yozgi Paralimpiya o'yinlarida para dzyudo bo'yicha erkaklar o'rtasida -60 kg vazn toifasida hamyurtimiz Sherzod Namozov ishtirokidagi bronza medali uchun kechgan bahs o'z yakuniga etdi.

Tajribali sportchimizga ruminiyalik Aleks Bologa raqiblik qildi. Murosasiz kechgan bellashuvning asosiy vaqtida g'olib aniqlanmadi. “Oltin ochko” uchun kechgan qo'shimcha bo'limlarda ham tomonlar bironta samarali usul qo'llay olishmadi. Yakunda hakam tatamida sust harakat qilgani uchun hamyurtimizni “shido” bahosi bilan jazoladi va bu ruminiyalik sportchiga bronza medalini taqdim etdi. Bungacha har ikki sportchi hisobida ikkitadan "shido" mavjud edi.

Eslatib o'tamiz, yana birozdan so'ng erkaklar o'rtasida -66 kg vazn toifasida yana bir hamyurtimiz Uchqun Quronboev final bahsida tatamiga chiqadi. U oltin medal yo'lida ispaniyalik Serxio Ibanesga qarshi kurashadi.

Eslatib o'tamiz, Sherzod Namozov Rio-2016 paralimpiadasida oltin medalni qo'lga kiritgan edi.