Tokio-2020. Dzyudo. Quronboev finalga chiqdi, Namozov «bronza» uchun dastlabki jangda g'alaba qozondi

Tokio-2020 paralimpiadasida dzyudo bo'yicha navbatdagi bahslar bo'lib o'tdi.

60 kg. vaznda musobaqaga borgan Sherzod Namozov chorak finalda yutqazib qo'ygach, bronza medali uchun jangda ishtirok etdi. Hamyurtimiz jazoirlik Ishak Uldkuiderga qarshi bellashuvda g'alaba qozondi. U jangning 58-soniyasida raqibiga nisbatan og'ritish uslubini qo'llashga muvaffaq bo'ldi.

Namozov bronza medali uchun yana bir o'tish bahsini mo'g'ulistonlik Yadambor Suxbaatarga qarshi o'tkazadi.

66 kg. vazndagi hamyurtimiz Uchqun Quronboev esa yarim finalda ukrainalik David Xoravaga qarshi tatamiga chiqdi. Raqib "vazari" bahosini ishladi, ammo vatandoshimiz raqibning yiqilib yotganidan foydalanib, uning elkasini erga tekkazgan holda ushlab oldi. Uchqun raqibini 20 soniya davomida ushlab turdi. Natijada Quronboev "ippon" tufayli finalga chiqdi.

Uchqunga finalda ispaniyalik Serxio Ibanes Banon raqiblik qiladi.

Manba: www.stadion.uz.