Diyor Imomxo'jaev: «Faqatgina bizga muxlislar kerak»

Superligada ikkinchi davra start olgach, stadionga muxlislar tashrifiga cheklov qo'yildi. Ushbu voqeaga taniqli mutaxassis Diyor Imomxo'jaev munosabat bildirdi. 

«Ko'rinyaptiki, muxlislar stadionga qaytishni juda istayapti. Ular Angliyani ko'ryapti, Ispaniyani ko'ryapti, Germaniya futboliga qarayapti va o'zimizning huvillagan maydonlarga. Biz albatta davlat test imtihonlarini futboldan ustun qo'ydik, abiturientlar uchun sharoit bo'lsin uchun futbol uchrashuvlarini boshqa stadionlarga ko'chirdik. Karantin me'yorlari sabab ma'lum muddat muxlislarning qadamini yana stadionlardan uzdik, ular sabr qilishdi.

Ammo bilamizki, sekin-asta talablar yumshatilyapti. Kechagina prezidentning sport haqida kuyunib aytgan fikrlaridan kelib chiqib, O'zbekiston Coca-cola kubogi 1/8 finaliga qadar muxlislarning stadionlarga qaytishi uchun rasman ruxsat etishsa, nur ustiga nur bo'lardi. Nasaf ham OFK kubogidagi xalqaro o'yinini o'zimizning qora ko'zlar qarshisida o'tkazardi. Bizda final uchun ajoyib imkoniyat bor, 30 yillikka Nasaf katta sovg'a hozirlashi mumkin.

Ochiq havo, yaxshi havo, yaxshi kayfiyat, karantin qoidalariga rioya qilish – hammasi bo'ladi. Faqatgina bizga muxlislar kerak», deydi mutaxassis.