Superliga. «Metallurg» qatorasiga to'rtinchi mag'lubiyatga uchradi

Mamlakat milliy chempionati birinchi davrasining yakuni hamda ikkinchi davraning avvali “Metallurg” uchun o'ta omadsiz keldi. Bekobodliklar inqiroz girdobidan chiqishning yo'lini topa olishmayapti. “Metallurg” ketma ket to'rtinchi o'yinni boy berdi...

Bu safar “Bunyodkor”ga, Olmaliq shahridagi OKMK stadionida. Uchrashuvning og'ir kechishini hamma taxmin qilgandi. Alamli mag'lubiyatlar, tarkibdagi muammolar murabbiylar shtabiga ham, o'yinchilarga ham katta bosim, yuk bo'ldi. Jasur Abduraimov shogirdlari psixologik – ruhiy chuqurlikdan chiqib keta olishmayapti. Bu safar jamoaga asosiy tarkib o'yinchilari Salamat Quttiboev, Abror Toshqo'zievlar yordam bera olishmadi. Tarkibga ikkinchi  davrada qo'shib olingan yosh futbolchilar esa hali jamoa o'yiniga to'liq qo'shilib keta olmadi. Xullas muammolar yig'ilib mag'lubiyatlar soni o'sayapti.

Uchrashuvning kulminatsion nuqtasi adashmasam 15-daqiqada yuz berdi. Maydon markazida Damir Temirov tomonidan ishlatilgan “podkad” VAR tomonidan “qizil"ga munosib ko'rildi. Ikkinchi vaziyatda ham VAR “qaldirg'ochlar” foydasiga ishladi. 44-daqiqada Zokir Qodirov “Bunyodkor” futbolchisi to'pni qo'li bilan o'ynaganligi uchun ikkilanmay penalti belgiladi. Ammo VAR o'yinchi orqasi bilan qaramay turib, to'pni qo'li bilan o'ynadi deb, uchrashuvdagi navbatdagi to'xtalishga sabab bo'ldi. 11 metrlik nuqtaga to'pni o'rnatib qo'ygan Stanislav Andreev hakamlar bir qarorga kelib bo'lguniga qadar “yonib ketdi”. Penaltini o'ta ishonchsizlik bilan amalga oshirdi va darvozabon to'pni qaytardi.

Ikkinchi taymda “Bunyodkor” son jihatidan ustunlikdan unumli foydalandi. Taym boshidayoq Farrux Ikromov ajoyib kombinatsiyadan so'ng darvozabon bilan yakkama yakka chiqib, hisobni ochdi – 1:0. 72-daqiqaga kelganda Ikromovning ajoyib uzatmasidan keyin Mirjahon Mirahmatov “Metallurg” darvozasini ishg'ol etdi – 2:0. 75-daqiqa maydonda kamchilik bo'lib qolgan “Metallurg” uchun bu hisobni o'zgartirish, mag'lubiyatdan qutilib qolish qiyin edi.

Shu tariqa, “Metallurg” qatorasiga to'rtinchi, mavsumdagi sakkizinchi mag'lubiyatini qabul qilib oldi.

Coca Cola Superliga. 15-tur
BUNYoDKOR – METALLURG – 2:0 (0:0). 13.08.2021 yil. Olmaliq shahri, OKMK stadioni.
Gollar: Farrux Ikromov (51), Mirjahon Miraxmatov (72).
Amalga oshirilmagan penalti: Stanislav Andreev (44).
«BUNYoDKOR»: 71. Sarvar Karimov, 4. Davronjon Ergashev, 6. Avazbek O'lmasaliev, 9. Farrux Ikromov, 13. Lutfulla To'raev (s), 14. Mirjahon Mirahmadov, 17. Odiljon Abdurahmonov, 26. Ulug'bek Abdullaev, 30. Abdulla Abdullaev, 34. Suhrob Izzatov, 49. Ibrohim Tomiva.
Zaxira: 1. Ravshanbek Yagudin, 3. Dian Talxatov, 7. Farhod Mirahmatov, 8. Sanjar Rashidov, 21. G'ayrat Azizxo'jaev, 22. Shahboz Erkinov, 33. Umarali Rahmonaliev, 35. Aziz Pirmuhammadov, 37. Muhammadodil Qahramonov.
«METALLURG»: 1. Akmal Tursunboev, 7. Ruslan Roziev, 10. Shahzodbek Nurmatov, 21. Kamoliddin Tojiev, 22. Shahzodbek G'ofurbekov, 28. Stanislav Andreev, 30. Ibrohim Ibragimov, 48. Dilshod Rahmatullaev, 55. Akbarjon Ismatullaev (s), 80. Farruxjon Ibrohimov, 98. Damir Temirov
Zaxira: 12. Aleksandr Lobanov, 4. Odilbek Abdumajidov, 6. Xudoyshukur Sattorov, 11. Ivan Nagaev, 15. Zohid Abdullaev, 25. Shahzodjon Ne'matjonov, 70. Muhammad Isaev, 79. Bobur Davlatov, 90. Abdurahmon Abdulhaqov
Ogohlantirish: O.Abduraxmonov (56)
Chetlatish: Damir Temirov (14).
Hakamlar: Zokirjon Qodirov, Ruslan Samandarov, Obid Jumaev, To'rabek Suyunov
Nazoratchi: Rashid Aytekov
VAR hakami: Rahimbek Karimov
VAR assistent: Baxtiyorxo'ja Shavkatov
VAR nazoratchisi: Valentin Kovalenko
Komissar: Zohirjon Akramxonov