Futbolni oyog'ini osmondan qilayotgan tennischi al-Xelayfiy haqida

Yo'q, hozir Messi haqida emas. Uni o'ziniki qilgan shaxs, futbolni oyog'ini osmondan qilayotgan tennischi al-Xelayfiy haqida

Messi Parijda. Bu ko'pchilik tomonidan kutilgan voqea. Zamonaviy futbolda biror yulduz futbolchining transferi haqida gap ketsa, o'sha gapning bir uchi albatta PSJ va uning qatarlik rahbari Nosir al-Xelayfiyga borib ulanadi. Albatta, doim rasmiy xabar ko'rinishida emas, lekin hech qursa, mish-mish tusida Parijga ko'chib o'tishlar yuz berib turadi. Nega?! Boisi bugun futbol olamidagi eng katta sarmoyador(lar) aynan PSJ rahbar(lar)i bo'lib turibdi.  

Nosir G'anim al-Xelayfiy – 1973 yil Qatarda tug'ilgan. Mutaxassisligi iqtisodchi bo'lgan Nosir 1992-2004 yillar oralig'ida Qatarning eng yaxshi tennischilaridan biri bo'lgan. U ATP reytingida top-1000 ichiga ham kirishga muvaffaq bo'lgan. Tennischi sifatida faoliyati yakunlangach bu sport turi bo'yicha bir qator rasmiy lavozimlarda ishlay boshlagan al-Xelayfiy uchun shunday vaqt keldi-ki – endi unga kort torlik qila boshladi. Futbol maydonini zabt etmoqni istadi uning ko'ngli.

2011 yil Qatar Sports Investments kompaniyasini boshqara boshlagan Nosir bu fondning asl muassisi bo'lgan Qatar qiroli (o'sha vaqt valiahdi) Tamam bin Hamadning ishonchli insonlaridan biridir. Vazifa – Qatar sportini ichki va tashqi miqyosda qo'llab-quvvatlash.

Ayni o'sha yili PSJ klubning 70 foiz aktsiyasini sotib olgan QSI bu bilangina kifoyalanmadi, albatta. Yo'l-yo'lakay “Barselona”ga titul homiy ham bo'ldi. (Qatar Foundation yozuvli liboslarni eslasangiz kerak). Asli futbol modeli, uslubi borasida Nosirning Katalon klubiga havasi qilishi sezilib turardi. Biroq, bu orada o'sha tarixiy kambek sodir bo'ldi – “Barselona” – PSJ - 6:1!

Hisobga qarang, tennisni eslatmayaptimiz sizga...

Ha! O'shanda yuziga tortilgan tarsakining qasosi bo'lsa shuncha bo'lar. Nosir al-Xelayfiy dastlab Neymarni 222 million (!) evro evaziga xarid qildi. Bu tarixni, undagi ikir-chikirlarni yaxshi bilsangiz kerak. Xayrulla Hamidov aytgandek, bu asli – “asr o'g'riligi” edi.

Ammo, shu bilangina to'xtamadi bu tennischi. Yo'q! U endi dunyo futbolining tengsiz javohiri Leo Messiga ko'z tikkandi. Qarangki, o'ta strateg, juda bilimli va ayyor Nosir al-Xelayfiyning qarshisida, kortning narigi tomonida raketka ushlashni eplolmaydigan Jozep Bartomeu turardi hamon... alal-oqibat u ikkinchi setni ham boy berdi – Messi Parijda. Geym. Set. Match! Yana o'sha nuqtaga keldik, a! U Parijda.

Al-Xelayfiy asr boshida “galaktikos”ni ko'rolmagan avlod uchun yana bir imkon bermoqda. Navas, Ramos, Markinos, Veratti, Di Mariya, Neymar, Mbappe va janobi oliylari Messi...

Ha, aziz muxlis, bu ko'pchilik o'ylayotgandek intiho nuqtasi emas, aksincha bu — yangi ibtido nuqtasi.

Menimcha, albatta!

Orif Tolipov.