«Metallurg» 2019 yilgi mavsumga qanday tayyorgarlik ko'ryapti?

Yaqinda O'zbekiston Professional futbol ligasining klublarni litsenziyalash bo'yicha Ishchi guruhi Bekobod shahriga tashrif buyurdi.

Tajribali mutaxassislar “Metallurg” markaziy stadionida bartaraf etilishi lozim bo'lgan ayrim kamchiliklarni qayd etib ketishgandi. Shunga ko'ra klub mutassaddilari kamchilik va nuqsonlarni qisqa fursatlar ichida bartaraf etish choralarini ko'rishmoqda.

Jumladan, “Metallurg” markaziy stadioni maydoni sifatini yaxshilash  bo'yicha Bekobod shahar hokimligi obodonlashtirish boshqarmasi mutaxassislari – agronomlar chaqirtirildi. Joyning o'zida vaziyat o'rganilib, maydonning ba'zi hududlari chimi o'zgartirilishi kerakligi, bundan tashqari katta miqdorda qumli tuproq yotqizilib, maydonga to'liq yangi chim urug'lari qadalishiga kelishib olindi.

Bu jarayonda avval maydon hududi tekislanib, keyin urug' qadash holati yangi mavsum boshlangunga qadar uch marotaba amalga oshiriladi. Ayni paytda chimi ko'karishi dargumon bo'lgan, sarg'ayib ketgan hududlarda ta'mirlash ishlari boshlab yuborildi. Shuningdek, maydonni sug'orish tizimi ham to'liq yangilanadigan bo'ldi.

Maydon va tribunalar oralig'idagi temir panjaralar yangi mavsumgacha olib tashlanib, muxlislar uchun qulayroq – pastroq trubalarga almashtiriladi. Maydon chetiga esa sun'iy  qoplamali chim yotqiziladigan bo'ldi.

Monitoring jarayonida mutaxassislar tomonidan ko'rsatib o'tilgan kamchiliklardan yana biri – tribunaning singan o'rindiqlarini almashtirish jarayoni ham tezkorlik bilan olib borilayapti. Futbolchilarning kiyinish, yuvinish xonalari, hakamlar va komissar xonalari esa qisqa fursat ichida joriy ta'mirdan chiqarilishi ko'zda tutilgan.

“O'zmetkombinat” muhandislari, elektriklari yordamida “Metallurg” markaziy stadionidagi yoritish tizimida ham kamchiliklar bartaraf etilmoqda. Jumladan, projektorlarga quvvat beruvchi moslama muruvvatlari yangilanayapti. Endilikda bu muruvvatlar katta kuchlanishni bemalol ko'taradigan holatga olib kelinmoqda.

Klubning futbolchilar oldidagi qarzdorlik holati bo'yicha: ayni paytda noyabr oyi uchun ish haqi va bitta uchrashuvga mukofot pullari berilmagan. Bu qarzdorlik ham Yangi yil bayramiga qadar uzilishi rejalashtirilyapti.

“Metallurg” futbol akademiyasini qurish, unga er hududi ajratish yuzasidan Bekobod shahri hokimligi qarori chiqdi. Akademiya qurilishi borasida takliflar klub muassisi – “O'zbekiston metallurgiya kombinati” AO rahbariyatiga taqdim etildi va xarajatlar smetasi tasdiqqa topshirildi. O'z navbatida “O'zmetkombinat” AO tomonidan akademiya loyihasi ham ishlab chiqilyapti.

Jamoa o'yinchilari dekabr oyining so'nggi o'n kunligida Qibray o'quv-mashg'ulot maskanida to'planishadi va jismoniy tayyorgarlikni tiklash jarayonini boshlab yuborishadi. Keyingi bosqich yig'inlarini o'tkazish rejasi esa shu kunlarda ko'rib chiqilmoqda.