To'yga to'yona bilan

4 yillik mehnat, 4 yillik tinimsiz mashg'ulotlar samarasini berdi. 3 ta oltin, 2 ta bronza qo'lga kiritildi. Ayniqsa, hech omadimiz kelmagan taekvandoda oltin olishimiz, og'ir atletikada rekordlar qo'yishimiz hammani quvontirdi. Sportchilarimiz mustaqilligimizning 30 yilligiga eng yaxshi sovg'ani tayyorlay olishdi.

Kuni kecha millat qahramonlari yurtimizga qaytib kelishdi. Ularni kutib olish uchun yuzlab yurtdoshlarimiz chiqib, nafaqat ularning, balki ota-onalarining quvonchiga ham sherik bo'lishdi.

To'yga to'yona bilan degan sarlavhamiz kecha ham majoziy ham asl ma'nosida namoyon bo'ldi — prezident sovg'alari yurtimiz nomini yuqori ko'targan kurashchimiz Bekzod Abdurahmonov va taekvandochi qizimiz Nigora Tursunqulovaning bo'lajak nikoh to'ylariga munosib sovg'a bo'ldi. Qolgan sovrindorlarimizga ham sovg'alar topshirildi.

Ushbu olimpiada nimasi bilan yodda qoldi? Albatta, Yangi O'zbekiston yoshlari naqadar kuchli ekanini dunyoga ko'rsatib qo'ygan Ulug'bek bilan, 4 yillik alamli ko'zyoshlar ortidan maqsadiga erishgan Bahodir bilan, yurtimiz sha'nini yuksaklarga ko'targan Akbar bilan. Ularning g'alabalari bu bizning g'alabamiz, O'zbekistonimiznig g'alabasi.

Orif Tolipov