«Barselona» Gamper kubogida «Yuventus»ni yirik hisobda mag'lub etdi (videosharh)

«Barselona» va «Yuventus» klublari Gamper kubogi doirasida o'zaro to'qnash kelishdi. Uchrashuv Barselonadagi Yoxan Kroyf Arena stadionida bo'lib o'tdi va 3:0 hisobida kataloniyaliklar foydasiga yakunlandi. «Barselona» Gamper kubogini 44 marta qo'lga kiritdi.

Uchrashuvning 3-daqiqasida Memfis Depay hisobni ochdi. Ikkinchi bo'limning 57-daqiqasida Martin Breytueyt kataloniyaliklarning ustunligini oshirdi. "Ko'k-anorranglilar"ning uchinchi golini Riki Puch 90+2 daqiqada kiritdi.

«Yuventus» hujumchisi Krishtianu Ronaldu birinchi bo'limni maydonda o'tkazdi, tanaffusdan keyin uning o'rniga Deyan Kulucevskiy maydonga tushdi.

Joan Gamper kubogi «Barselona» tomonidan har yili o'tkaziladigan o'rtoqlik turniri hisoblanadi. Turnirning birinchi uchrashuvi 1966 yilda bo'lib o'tgan. Oxirgi marta «Barselona» bu sovrin uchun bahsda 2012 yilda yutqazgan, o'shanda «Sampdoriya» 1:0 hisobida g'alaba qozongan edi.

Gamper kubogi.
Barselona – Yuventus – 3:0 (1:0)
Gollar: 1:0 – Depay (3), 2:0 – Breytueyt (57), 3:0 – Puch (92).
«Barselona»: Neto, Dest (Emerson, 62), Pike, Arauxo (Umtiti, 62), Jordi Alba (Balde, 71), Buskets, Serdji Roberto (Puch, 71), Demir (Gonsales, 62), Grizmann (Kolyado, 86), Depay, Breytueyt (Manay, 78).
«Yuventus»: Shchensni (Perin, 46), De Shilo (de Vinter, 79), de Ligt (Kellini, 61), Rugani (Bonuchchi, 61), Aleks Sandro (Pellegrini, 46), Bentankur (Danilo, 46), Remzi (Makkenni, 46), Bernardeski (Ranokkiya, 61), Kuadrado (Keza, 46), Morata (Markes, 61), Ronaldu (Kulusevski, 46).