Tokio-2020. Ettikurash. Voronina musobaqani 12-pog'onada yakunladi

Yozgi olimpiya o'yinlarida ayollar o'rtasidagi ettikurash bahslari yakuniga etdi. Sportchilar musobaqa so'ngida 800 metrga yugurish bahslarida ishtirok etishdi.

O'zbekistonlik Ekaterina Voronina masofani 2:09.73 daqiqada bosib o'tib, finishga o'z guruhida to'rtinchi bo'lib etib keldi. Bu orqali hamyurtimiz ushbu yo'nalishda mavsumdagi eng yaxshi natijasini qayd etdi. Unga mazkur natija uchun 969 ball berildi.

Voroninaning umumiy ochkolari 6298 ballga etdi va u 24 sportchi orasida 12-pog'onani band etdi. Kuchli o'nlikka kirishi uchun unga 20 ball etmadi.

Ayollar ko'pkurashi musobaqasida oltin medal belgiyalik Nafissatu Tiamga nasib etdi. U 6791 ochko jamg'ardi. Kumush va bronza medallarini esa niderlandiyalik sportchilar — Anouk Vetter (6689) va Emma Ostervegel (6590) qo'lga kiritishdi. Uchinchi o'ringa asosiy da'vogar bo'lib turgan belgiyalik Nur Vidts (6571) so'nggi mashqdan so'ng 4-o'ringa tushib qoldi.