Tokio-2020. Erkin kurash. «Bronza» uchun o'tish bahsida Shapiev g'alaba qozondi, Abdullaev yutqazdi

Tokio olimpiadasining kechagi kun yakunlari bo'yicha erkin kurashchilarimiz Javrail Shapiev (86 kg.) va G'ulomjon Abdullaev (57 kg.) bronza medali uchun bahslarda ishtirok etish huquqini qo'lga kiritgandi.

Shapiev shveytsariyalik Stefan Reychmutga qarshi gilamga chiqib, 5:2 hisobida g'alaba qozondi. Endi u rossiyalik Artur Nayfonovga qarshi bronza medali uchun jangda ishtirok etadi. Mazkur jang Toshkent vaqti bilan taxminan 15:50da boshlanadi.

G'ulomjon Abdullaev kecha yarim finalga chiqishiga bir baxya qolgandi. Ammo bronza medali uchun o'tish uchrashuvi hamyurtimiz uchun muvaffaqiyatsiz kechdi. U AQShlik Tomas Patrik Gilmanga imkoniyatni boy berib qo'ydi — 1:11.

Shu tariqa, ushbu vatandoshimiz olimpiadani medalsiz yakunlaydigan bo'ldi.