Tokio-2020. Boks. Muvaffaqiyatsizliklar davom etadi: Sanjar Tursunov ham yutqazdi

Tokioda boshlangan yozgi olimpiya o'yinlarining dastlabki kuni O'zbekiston delegatsiyasi uchun juda muvaffaqiyatsiz kelmoqda. Sportchilarimiz birin-ketin muvaffaqiyatsiz ishtirok eta boshlashdi. Ularning safini esa bokschimiz Sanjar Tursunov to'ldirdi.

91 kg. vaznda Yaponiyaga tashrif buyurgan Sanjar ilk saralash bosqichidayoq o'z yurishini to'xtatdi. U jazoirlik Abdulhafiz Benshablaga qarshi ringga ko'tarilib, imkoniyatni boy berdi.

Raqib jangni faol boshladi va ilk daqiqalarda ochkolarni ko'paytirib oldi. Tursunov e'tiborini kuchli zarbalarga qaratgan bo'lsa, Benshabla "jeb" zarbalar sonini ko'paytirishga urindi. Natijada birinchi raund Abdulhafiz foydasiga hal bo'ldi.

Hamyurtimiz ikkinchi va uchunchi raundlarni faollik oshirishga harakat qildi, ammo u to'la ustunlikka ega bo'la olmadi. Kichik ustunlik esa yakunda Abdulhafizning g'alabasini ta'minladi — 1:4 (29-28, 28-29, 28-29, 28-29, 27-30).

Shu tariqa, eng ko'p medal jamg'arishi kutilayotgan boks sport turidan ilk kundayoq yo'qotishga uchradik.

Manba: www.stadion.uz.