Tokio-2020: Birinchi kunda 11 nafar hamyurtimiz ishtirok etadi

Bugun Tokio-2020 Olimpiya o'yinlarining ilk kuni. Unda terma jamoamizning 11 nafar vakili ishtirok etadi. Quyida ularning chiqishi haqidagi ma'lumotlarni havola qilamiz:

XXXII yozgi Olimpiya o'yinlarida hamyurtlarimiz ishtirokini birinchi bo'lib mergan qizimiz Muxtasar Tohirova boshlab beradi. Namanganlik sportchimiz 10 metrdan miltiqdan otish bo'yicha saralash dasturida qatnashadi. Mazkur musobaqa Toshkent vaqti bilan 04:30 da boshlanadi.

Shundan so'ng qilichbozlarimiz bahslarga kirishadi. Dastlab 05:30 da sablyachimiz Sherzod Mamutov ruminiyalik Yulian Teodotsiu bilan hisob-kitob qilsa, 07:25 da shpagachimiz Malika Hakimova xitoylik Yiven Sunga qarshi jang olib boradi.

Soat 07:00 da velosportchimiz Murodjon Xolmurodov velosportning shosse yo'nalishida 234 km masofada o'tkaziladigan guruh poygasidagi startini boshlaydi.

Tokio kanallarida akademik eshkak eshuvchilarimiz Shahboz Xolmirzaev va Sobir Safaraliev soat 06:50 dan e'tiboran saralash bahslariga kirishadilar. Hamyurtlarimiz birinchi guruhda 4-yo'lakda harakat qilishadi.

Shuningdek, soat 07:00 da tennischimiz Denis Istominning hindistonlik Sumit Nagalga qarshi kortga chiqadi.

Shundan so'ng e'tiborimizni boks bahslariga qaratamiz. Soat 07:30 da ayollar o'rtasida -69 kg vazn toifasida ishtirok etadigan hamyurtimiz Shahnoza Yunusova polshalik Karolina Kosevskaga qarshi ringga ko'tariladi. Taxminan soat 10 da esa yana bir bokschimiz Sanjar Tursunov (-91 kg) ishtiroki kutib turibdi. Unda hamyurtimiz jazoirlik Abdulxafid Benchablaga qarshi to'qnash keladi.

Rasuljon Abdurahimov soat 15:30 dan boshlanadigan sport gimnastikasining ko'pkurash yo'nalishi, saralash bosqichida ishtirok etadi.

Shubhasiz, ushbu kun doirasida ko'pchilikning e'tibori dzyudo bahslariga qaratiladi. Unda Sharofiddin Lutfillaev -60 kg vazn toifasida bahs olib olib boradi. Polvonimiz musobaqani Ukraina va Gvatemala vakillari o'rtasidagi bahs g'olibiga qarshi boshlaydi. Dzyudo bahslari soat 07:00 dan boshlanadi. Hamyurtimiz birinchi davradan erkin o'tgani uchun uning ishtiroki taxminan 30-40 daqiqalardan keyin boshlanadi.

O'zbekiston Milliy Olimpiya qo'mitasi bo'lajak bahslarda barcha hamyurtlarimizga omad va zafarlar tilab qoladi.