Tomas Tuxel "Chelsi" rahbariyatidan 200 mln evrolik hujumchi transferini so'radi

"Chelsi" bosh murabbiyi Tomas Tuxel Dortmundning "Borussiya" klubi hujumchisi Erling Holandni o'z jamoasida ko'rishni istamoqda, deb xabar bermoqda Bild.

Manbaning xabariga ko'ra, nemis mutaxassisi klub rahbariyatidan yozgi transferlar vaqtida hujumchini sotib olishni so'ragan. Ammo norvegiyalikni sotib olish qiyin bo'ladi, chunki "Borussiya" uni 200 million evroga baholamoqda.

O'tgan mavsum 20 yoshli Holand "Borussiya" tarkibida barcha turnirlarda 41 uchrashuv o'tkazib, ularda 41 ta gol urgan va 12 ta golga uzatma bergan. Uning klub bilan shartnomasi 2024-yilning yozigacha amal qiladi.