Nihoyat, Argentina va Messi Kopa Amerikada g'olib chiqdi

Argentina terma jamoasi Braziliyada bo'lib o'tgan Amerika kubogi musobaqasida bosh sovrinni qo'lga kiritdi. "Albiseleste" finalda mezbonlarga qarshi maydonga chiqib, kichik hisobda g'alaba qozondi.

Birinchi bo'limda argentinaliklar to'pni nazorat qilishgan bo'lsa, "pentakampeonlar" biroz ehtiyotkor o'yni namoyish qilishdi. Uchrashuvning 22-daqiqasida esa hisob ochildi. De Paul olis masofadan Di Mariya tomon uzatma berdi. Himoyachi Lodi to'pni qaytara olmadi. Anxel esa yakkama-yakka vaziyatda to'pni darvozabonning ustidan oshirib, to'rga joylab qo'ydi.

Ikkinchi bo'limda Braziliya o'z o'yinini o'zgartirib, hujumga ko'proq o'ta boshladi. 52-daqiqada ular hisobni tenglashtirishgan edi, ammo Risharlison ofsaydda bo'lgani uchun gol bekor qilindi.

Keyingi daqiqalarda argentinalik posbon Emiliano Martines kamida 3ta seyv namoyish etib, o'z darvozasi daxlsizligini saqlab qoldi. O'yinning asosiy vaqti tugashiga 2 daqiqa qolganida Argentina xavfli qarshi hujum tashkil qildi. Messi esa darvozabon bilan yakkama-yakka vaziyatda o'z imkoniyatidan foydalana olmadi.

Ikkinchi taymga qo'shib berilgan 5 daqiqada Argentina raqibga imkon bermaslikka harakat qildi. Hakamning hushtagi yangraganidan keyin esa Lionel Messi o'z faoliyatida ilk marta Amerika kubogini qo'lga kiritgani rasman tasdiqlandi.

Amerika kubogi, Final
Argentina – Braziliya 1:0 (1:0, 0:0)
Gol: 1:0 – 22 Di Mariya.
Argentina – Martines, Otamendi, Romero (Petstselya, 79), Montiel, Akunya, de Paul, Paredes (Rodriges, 54), Lo Chelso (Talyafiko, 63), Di Mariya (Palasios, 79), Messi, Martines (Gonsales, 79).
Braziliya – Ederson, Lodi (Emerson, 76), Danilo, Tiago Silva, Markinos, Fred (Firmino, 46), Kazemiro, Lukas Paketa (Gabriel Barboza, 76), Everton (Vinisius Junior, 63), Neymar, Risharlison.
Ogohlantirishlar: Fred (3), Paredes (33), Lo Chelso (51), de Paul (68), Lodi (70), Lukas Paketa (72), Otamendi (81), Markinos (82), Montiel (89).

Manba: www.stadion.uz.