Buyuk Britaniya qirolichasi Evro-2020 finali oldidan Sautgeytga xat yozdi

Buyuk Britaniya qirolichasi Elizaveta II Evro-2020 finali oldidan Angliya terma jamoasi bosh murabbiyi Garet Sautgeytga xat yozdi.

"Janob Garet Sautgeyt, murabbiy,

55 yil avval menga Bobbi Murga jahon kubogini topshirish nasib etgandi. O'shanda men futbolchilar, rahbariyat va yordamchi xodimlar uchun yirik xalqaro musobaqa finaliga chiqish va unda g'olib chiqish nima ekanini o'z ko'zim bilan ko'rganman.

Barchangizni oilam nomidan Evropa chempionati finaliga chiqqaningiz bilan tabriklayman hamda ertangi bahsda omad tilayman. Umid qilamanki, mazkur o'yin nafaqat sizning muvaffaqiyatingizni, balki ruhiyatingizni, maqsadga intiluvchanligingizni va faxr tuyg'usini tarixga yozadi.

Elizaveta R.".

Eslatib o'tamiz, Angliya va Italiya terma jamoalari o'rtasidagi Evro-2020 final bahsi 11 iyuldan 12 iyulga o'tar kechasi Toshkent vaqti bilan 00:00da boshlanadi.