Riberi: «Fiorentina»dan ko'proq hurmat kutgandim»

Yarim himoyachi Frank Riberi «Fiorentina»dan yangi shartnoma kutganini aytib o'tdi. Eslatib o'tamiz, 1 iyul kuni 38 yoshli futbolchining klub bilan shartnomasi yakuniga etdi va u jamoani tark etdi.

«Qiyinchiliklarga qaramay, «Fiorentina», ishqibozlar va ushbu shahar bilan ikki yilni o'tkazdim. Bu ajoyib davr bo'ldi. Men ko'pgina ajoyib insonlar bilan tanishdim.

Afsusdaman. Chunki «Fiorentina»da yana bir yil o'ynashni istagandim, ammo taqdirim shunday ekan. Men klubga hamisha sodiq bo'ldim va bor kuchimni berdim. Florentsiyada qolishni istagandim, ammo bu niyatim amalga oshmadi. Men klubni hech qachon tanqid qilmadim. Bu jamoadan yaxshi xotiralar qoldi. Men A seriyada qolishni istayman, ammo hozircha kelajagim borasida hech narsa aniq emas.

Menga oson bo'lmadi. Bu jamoa uchun borimni berdim, ammo menga hech kim hech narsa demadi. So'nggi 3-4 hafta qo'ng'iroq bo'lishini kutdim. Jamoadan ko'proq hurmat kutgandim, ammo bu hayot», — dedi Riberi.