Nigoh: Ronaldu «Barsa»ga o'tadi? Nahotki, shu mumkinmi?

Bir narsa aniq: Krishtianu Ronaldu azaldan Lionel Messi bilan bitta jamoada o'ynash xohishini yashirmagan! Evro-2020 tobora qiziyotgan pallada Ispaniyaning AS nashri futbol olami e'tiborini birozgina chalg'itdi. Obro'li gazetada yozilishicha, «Barcelona» shu yozda Krishtianu Ronaldu bilan shartnoma tuzishga urinib ko'radi. «Asr transferi» g'oyasi «Barsa»ning ustakor prezidenti Joan Laportadan chiqqani aytildi. U Krishtianu Ronaldu va Lionel Messini bitta klub bayrog'i ostida birlashtirgan birinchi xo'jayinga aylanmoqchi, shekilli. Aytgancha, Laporta 2003 yili, ya'ni birinchi prezidentlik davrida ham Ronalduni «Sporting»dan sotib olishni xohlagandi.

Joan Laporta keyinchalik o'sha, samarasiz birinchi urinishi haqida batafsil so'zlab bergandi: «Agentlardan biri bizga «Sporting»da iqtidorli futbolchi borligi va klub uni «MYu»ga atigi 19 million evroga sotmoqchi bo'layotganinini aytdi. Bu Krishtianu Ronaldu edi. Eng qizig'i, uni bizga 17 millionga sotib olishni tavsiya etishdi, ammo o'sha transferlar bozorida Ronaldino xaridiga kattagina mablag' sarflashga ulgurgandik. Oxir-oqibat, Ronalduni sotib olishdan voz kechishimizga to'g'ri kelgandi».

Darvoqe, oldinroq Ronaldu va Messining «Yuventus» yoki «PSJ»da birga o'ynashlari ehtimoli borligi haqida xabarlar tarqalgandi. Mana, navbat «Barselona»ga keldi. Ta'kidlanishicha, Kataloniya superklubi Krishtianu evaziga «Yuventus»ga 3 nafar futbolchini taklif qilmoqda: Antuan Grizmann, Serxi Roberto va Filippe Koutino. Turinliklarda shulardan ikkisini tanlash imkoni bor. Eng qizig'i, Ronalduning o'zi 2016 yili Messi bilan birga o'ynash niyatini oshkor qilgandi. «O'ylaymanki, bizni bitta jamoa libosida ko'rish hamma uchun qiziqarli. Aslida buyuk futbolchilar birga o'ynashlari kerak», - degan edi Krishtianu France Football nashriga bergan intervyusida.

Eslatma, Ronalduning «Yuventus» bilan yana 1 yillik shartnomasi bor. Biroq portugaliyalik ertaroq ketishni istamoqda: u Turin klubining yakunlangan mavsumdagi natijasidan zada bo'ldi. Messi esa «Barsa» bilan hali yangi  shartnoma tuzganicha yo'q. Kataloniyaliklar o'z navbatida, Messining eng yaqin do'sti Serxio Agueroni o'z tomonlariga og'dirishdi. Agar Ronaldu ham «Barselona» safiga qo'shilsa, unda Leoning qolishi aniq. U yangi sinovga tayyor, albatta. Ammo dunyo futboli Ronaldu va Messini bir joyda ko'rishga tayyormi? Tushunarliki, «Real» muxlislari voqealarning bunday rivojini aslo ma'qullamaydilar. Ehtimolki, ular bunda qahramon-Ronalduni sotqin-Ronalduga chiqarib qo'yishadi ham...

H.ATAVULLAEV tayyorladi