Diyor Imomxo'jaev Superliga taqvimi va "Nasaf"ning OFK kubogidagi yurishiga o'zgartirish kiritilgani haqida ma'lumot berdi

O'zbekiston Superligasi direktori vazifasini bajaruvchi Diyor Imomxo'jaev O'zbekiston chempionatining keyingi taqvimi, hamda "Nasaf"ning OFK kubogidagi keyingi o'yinlari haqida o'z telegram kanalida ma'lumot berdi. Imomxo'jaevning ma'lum qilishicha, "Nasaf" endilikda OFK kubogi pley-off bosqichida ikkita emas, balki bitta o'yin o'tkazadi. Qolaversa, ushbu bahslar Qarshida o'tishi ehtimoli ham bor.

"Avgustdan oyidan boshlab dekabrga qadar bo'lgan uchrashuvlar taqvimini aniqlashda ikki masala halal berayotgani haqida yozgandik:

▪️sentyabr, oktyabr, noyabr oylaridagi FIFA kunlari uchun O'zbekiston MTJ rejasi aniq emasdi;
▪️Nasaf klubining OFK kubogidagi keyingi o'yinlari rejasi to'liq aniq emasdi.

Shunga qaramay, biz FIFA kunlaridan kelib chiqib, taqvim tuzdik. Superligadan kelib chiqib, Pro liga sanalarini aniqlab oldik. Ammo o'rtada OFK Nasafga bog'liq musobaqada yana o'zgarishga qo'l urdi. Endilikda OFK kubogining pley-off o'yinlari ikki emas, bir uchrashuvdan iborat bo'ladi.

Biz Nasaf ikkitadan uchrashuvda ishtirok etishini inobatga olgandik, endi sentyabrning 20-sanasidan keyingi taqvim uchun biroz o'zgarish kiritishga majburmiz. 25 avgust kuni esa Nasaf Turkmanistonning Ahal klubiga qarshi o'ynaydi. Uchrashuvning qaerda o'tishi 7 iyul kungi qur'a orqali aniq bo'ladi. Biz Turkmanistondagi pandemik holat va albatta o'yinning Qarshida o'tishi ehtimolidan kelib chiqib ish ko'rdik. Pro liga 16-turini ham shunday vaqtga qo'yganmizki, Futbol-TV Nasafning Qarshidagi o'yinini translyatsiya qilishiga to'g'ri kelsa, KTS G'uzordan Qarshiga etib kelishi inobatga olingan. Umid qilamizki, Nasaf muvaffaqiyatli yurishini endi o'zimizning muxlislar ko'z o'ngida davom ettirish imkoniyatiga ega bo'ladi", - deydi Diyor Imomxo'jaev o'z telegram kanalida.