Ana, xolos! Kanga emas, Kiaku-Kiaku Kiangani...

«Rostov»da o'ynagan Kaku Gelor Kangani bilasizmi? Afrikalik ushbu futbolchi yaqinda hujjatlarni qalbakilashtirishda ayblandi: u pasportida ko'rsatilganidan 5 yil oldin, boz ustiga, umuman boshqa mamlakatda tug'ilgan ekan. Butun boshli detektiv...

Kaku Gelor Kanga - afrikalik futbolchi. U vaqtida Miodrag Bojovich boshqargan «Rostov» safida o'ynagan va hattoki, Rossiya kubogini yutgan. Kanga keyinchalik Qurbon Berdiev qo'l ostida atigi bir mavsum ishladi va rostovliklar ChLga chiqishlaridan oldin klub bilan xayrlashdi. Kanga «Rostov»dan ketgach, faqat slavyan mamlakatlari klublarida o'ynadi: dastlab «Tsrvena Zvezda»da 2 yil, so'ngra Praganing «Sparta»sida 3 yil (Chexiyada har mavsum kamida 12ta gol urdi). Futbolchi o'tgan mavsum yana «Zvezda»ga qaytdi. Ayni kunlarda esa futbolchining hayotida notinchlik - Kanganing faoliyati Afrikada keng muhokama qilinmoqda.

Yarim himoyachining rasmiy tug'ilgan sanasi - 1990 yil 1 sentyabr. Hujjatlarga ko'ra, u Gabonning Ekvatorial Gvineya bilan chegarasi yaqinidagi Oem shahrida dunyoga kelgan. Ammo Kongo Demokratik Respublikasi futbol federatsiyasida boshqacha ma'lumotlar mavjud. Kongoliklarning ma'lum qilishlaricha, Kanga aslida Kiaku-Kiaku Kiangani ekan. Yoshini qalbakilashtirish ayblovi yanada qiziq. Ma'lum qilinishicha, Kanga pasportida ko'rsatilganidan 5 yil oldin tug'ilgan, boz ustiga, Gabon emas, balki Kongo DR poytaxti Kinshasada. U hattoki, futbol mashg'ulotlarini ham shu erda boshlagan. Barchasi 2005 yili futbolchiga berilgan litsenziyasida qayd etilgan. Ushbu hujjatda tug'ilgan sanasi ham ko'rsatilgan - 1985 yil 8 oktyabr. Biroq Kiaku-Kiaku ke­yinchalik qaergadir g'oyib bo'ladi va faqat 2007 yili Gabonning «Mangasport» klubida ko'rinish beradi. Qiziq, futbolchining o'zi bunga nima deydi? «Yo'q, Kongo DR tomonidan berilgan tug'ilganlik haqidagi guvohnoma yoki pasportga ega emasman, - dedi Kanga. - Menda vakolatli idoralar tomonidan berilgan Gabon pasporti bor. Agar buning aksini ko'rsatadigan dalillar mavjud bo'lsa, oldimga keltiringlar».

Kongoliklar hujum yo'nalishiga ham egalar: Kanganing onasi keyinchalik Gabonga ko'chib o'tish uchun 1986 yili soxta o'lim hujjatini rasmiylashtirgan va ma'lum muddat mamlakatda boshqa nom bilan yashagan. Gabonda futbolchiga berilgan tug'ilganlik to'g'risidagi guvohnoma ham shubhali: u qayd qilingan sanadan 3 kun o'tib ro'yxatdan o'chirilgan va manzil ham ko'rsatilmagan. Kongo futboli rasmiylari allaqachon AFK (CAF)ga murojaat qilishdi, ammo ularning da'volari etarli asoslar yo'qligi tufayli inkor etildi. «Rostov»da uning hujjatlari borasida hech qanday shubha tug'ilmagan. Kanga o'ynagan klublarga xavf bormi? O'ylashimcha, yo'q. Bu mojaroda barcha savollar Gabon federatsiyasiga yo'naltirilishi kerak. Shuningdek, transferlar ro'yxati FIFA orqali o'tadi», - deya munosabat bildirdi «Rostov» klubining sobiq vitse-prezidenti Aleksandr Shikunov.

«Tsrvena Zvezda» ham darhol futbolchini himoya qilib chiqdi: «O'z futbolchimizga ishonishimizni ta'kidlamoqchimiz. Amalda Kanga qo'lida pasport va Fran­tsiyada yashash guvohnomasi mavjud. U Rossiya va Chexiyada o'ynagan va hech qachon muammoga duch kelmagan. Bu vaziyatni ikki millat o'rtasida Afrika Millatlar kubogi yo'lidagi urush o'rnida qabul qilamiz. Bunda birgina Gelor Kanga qurbon emas. O'ylaymizki, barchasi yaqin orada futbolchimiz foydasiga hal bo'ladi».

***    Afrika kubogi saralash bosqichida tarkibida Kanga o'ynagan Gabon termasi Kongo DR jamoasini mag'lubiyatga uchratdi. Buning oqibatida kongoliklar musobaqaning final raundiga chiqish imkoniyatidan mahrum bo'lishdi.

***        Kongoliklar hali qo'l ko'tarmoqchi emaslar. Ular AFKga qayta da'vo yozmoqchilar, demak, detektivning davomi bor...

D.ALIMOV tayyorladi