Ulug'bek Baqoev: «Paxtakor» bilan safarda durang o'ynash — biz uchun muhim ochko»

Superliganing 10-turidan o'rin olgan «Paxtakor» — «So'g'diyona» (0:0) uchrashuvidan keyin mehmonlar bosh murabbiyi Ulug'bek Baqoev matbuot anjumanida ishtirok etdi.

«Paxtakor» — kuchli jamoa va amaldagi O'zbekiston chempioni. Ular bilan ochiq futbol o'ynash juda og'ir. Shu bois himoyadan o'ynashga qaror qildik, himoyada yaxshi harakat qildik. Menimcha, durang adolatli natija. Ular ham, biz ham darvoza to'sinni poyladik. Keyingi o'yinlarda «Paxtakor»ga omad tilayman, biz esa keyingi bahslarga tayyorgarlikni boshlaymiz", — deb gap boshladi Baqoev.

— «Paxtakor» bir qator etakchilari bugun maydonga tushmasliklari oldindan ma'lum edi. «So'g'diyona» g'alaba qozonib birinchi o'ringa chiqib olish imkoniyatidan foydalana olmadi. Futbolchilar so'nggi daqiqalarda ochiqchasiga vaqt cho'zishdi, bu nima bilan bog'lik?
— O'yin doim ham siz xohlagandek chiqmaydi. Oldingi 9ta turning barchasida kamida bittadan gol urib kelayotgandik. Bugun esa bu an'anamiz yakuniga etdi. Bunga «Paxtakor» futbolchilari yo'l qo'yishmadi. Biz natija uchun o'ynadik va o'sha natijaga erishdik. Rahbariyatni bir ochko bilan tabriklayman.

— Bugun Norxonovning o'yini uncha o'xshamadi. Bu uning terma jamoadan yaqinda kelgani sababli bo'ldimi?
— U kuni kecha Saudiya Arabistonidan qaytib keldi. Shohruzni taxminan 1 oy ko'rmadik. Uning hozirgi holati bilan to'liq tanish emasmiz. Tez orada u yana o'z formasiga qaytib oladi.

— Durangdan qoniqdingizmi?
— Ha, amaldagi chempion bilan safarda durang o'ynash biz uchun muhim ochko hisoblanadi.

Manba: https://t.me/fcsogdianajizzak