Evro-2020 finali boshqa shaharga ko'chiriladimi? UEFA bayonot berdi

UEFA Evropa chempionatining finali Londondan Budapeshtga ko'chirilishi mumkinligi haqidagi xabarga munosabat bildirdi.

Avvalroq Britaniyaning "The Times" nashri Londondagi koronavirus bilan bog'liq cheklovlar tufayli Evro-2020 finali Budapeshtga ko'chirilishi mumkinligi haqida yozgandi.

"Pley-off bosqichidan boshlab "Uembli"ga kiradigan muxlislar 50 foizgacha oshirilishidan UEFA mamnun. Hozirda mahalliy hokimiyat bilan muzokara olib boryapmiz. Unga ko'ra, tomoshabinlar maxsus test orqali Londonga kelishiga ruxsat berilishini so'rayapmiz. Bunda ularning kelib-ketishi maxsus transportlar yordamida amalga oshiriladi va bu jarayon 24 soatdan ko'p vaqtni olmaydi.

Ayni paytda hukumat duch kelayotgan bosimni tushunamiz. Ushbu masalada muzokaralarimiz ijobiy yakun topishiga umid qilamiz. Kutilmagan vaziyatlar uchun hamisha zaxira variantimiz mavjud. Ammo umid qilamiz, final haftasi Londonda o'tadi", - deyiladi UEFA tarqatgan bayonotda.

Eslatib o'tamiz, Evro-2020 finali 11 iyul kuni "Uembli" stadionida o'tkazilishi rejalashtirilgan.

Manba: soccernews.ru