Evro-2020. Italiya keyingi bosqichga yo'l oldi — «A» guruhida 2-tur ortda qoldi

Roberto Manchini jamoasi Shveytsariyaga qarshi bahsda mag'lubiyatsiz o'yinlari sonini 29taga etkazib olgan holda, guruhda ikkinchi g'alabani qo'lga kiritdi va musobaqa nimchorak finaliga yo'l olishdi.

O'yin haqida qisqacha

O'yinning 19-daqiqasida Jorjo Kellini hisobni ochdi, ammo gol hisobga olinmadi. VAR himoyachi qo'l bilan o'ynagani uchun kiritilgan golni bekor qildi.

26-daqiqada Manuel Lokatelli baribir hisobni ochdi va Italiya terma jamoasini oldinga olib chiqdi. Berardining o'ng qanotdan uyushtirib kirib borishi va Shveytsariya jarima maydonchasi o'rtasiga uzatmasidan keyin Domenikoning «Sassuloda»gi jamoadoshi to'pni darvozaga joylab qo'ydi.

Ikkinchi bo'limning 52-daqiqasida Lokatelli 25 metrlar masofadan Yan Sommer darvozasini yana bir bor ishg'ol qildi — 2:0.

Vladimir Petkovich shogirdlarida ham Stiven Zuberning zarbasidan keyin qulay imkoniyat bo'lgandi, ammo hisob qisqarishiga Janluiji Donarumma yo'l qo'ymadi.

Uchrashuvda bir nechta imkoniyatlarni ko'kka sovurgan Chiro Immobile 89-daqiqada nomini tabloga yozdirib qo'yishga muvaffaq bo'ldi — 3:0.

Mazkur o'yinning eng yaxshi futbolchisi sifatida Manuel Lokatelli topildi. U faoliyatida ilk bor klub yoki mamlakat jamoasida dublga erishganini qayd etish lozim.

Ayni vaqtda Lokatelli va Immobile hisobida ikkitadan gol bor va ular Lukaku, Shik, Ronaldu bilan to'purarlar poygasida etakchilik qilishmoqda.

Roberto Manchini uchrashuvdan keyin o'z fikrlari bilan bo'lishdi: Shveytsariya kuchli jamoa. O'yin biz kutganimizchalik qiyin kechdi. Bir nechta vaziyatlar yaratdik va g'alabaga haqli edik. O'yin avvalida harakatni boshladik, keyin raqibga kusgli bosim qilgan holda ularni xato qilishga majbur etdik. Yigitlar buni juda yaxshi bajarishdi. Oson bo'lmadi, sababi juda issiq havo hamda besh kun ichida ikkinchi o'yin edi.

Italiya yarim himoyachisi Manuel Lokatelli: O'yinning eng yaxshi futbolchisi mukofotiga sazovor bo'lganimdan faxrlanaman, ammo ushbu sovrinni butun jamoam bilan bo'lishishni istayman. O'ylaymanki, biz ajoyib jamoamiz. Birinchi golimni oilam uchun bag'ishlayman. Berardining uzatmasidan keyin, uning harakatini oldindan bilganim uchun unga ergashdim. Ikkinchi golim Italiya muxlislari uchun. Chunki biz ularni yana xursand qilish uchun o'ynaymiz.

Shveytsariya ustozi Vladimir Petkovich: Italiyani g'alaba bilan tabriklayman. Ular zo'r o'yin ko'rsatishdi. Bugun jamoa xafa bo'lishga munosib edi, lekin ertaga birinchi mashg'ulotlardan ishga kirishamiz. Jamoamga bizni keyinga bosqichga olib chiqish uchun uch ochko olishimiz mumkin bo'lgan o'yin qolganini aytdim.

Shveytsariya sardori Granit Jaka: Italiya yaxshiroq o'yin ko'rsatdi. Ularga qarshi bahsda xato qilish kechirilmaydi. Endi e'tiborimizni Turkiya bilan bahsga qaratamiz.

Kalit statistikalar

Italiya Shveytsariyaga qarshi oxirgi 9 xalqaro o'yinda mag'lubiyatga uchramadi — 5 g'alaba, 4 durang.

Oxirgi marta Shveytsariya 1993 yilning may oyida JCh saralashida 1:0 hisobida «skuadrazzura»ni taslim etgandi.

Italiya Evro musobaqasi guruh bosqichining so'nggi 9 o'yinida uchta gol o'tkazib yuborgan xolos.

Italiya oxirgi 10 xalqaro o'yinda birorta gol o'tkazmadi va raqiblar darvozasini 31 marotaba ishg'ol qildi.

Italiya so'nggi 29 uchrashuvida mag'lub bo'lgani yo'q (24 g'alaba, 5 durang). Oxirgi mag'lubiyat 2018 yilning sentyabr oyida Portugaliyaga qarshi to'qnashuvda kuzatilgandi.

Italiya oxirgi 10 o'yinining barchasida ikkita yoki undan ko'proq gol urishga muvaffaq bo'ldi.

Shveytsariya Evrodagi oldingi 15 uchrashuvning ikkitasida g'alaba qozongan (penaltilar tseriyasi orqali g'olib aniqlangan o'yinlar ham hisobga olingan).

Shveytsariya so'nggi 10 Evro uchrashuvlarining uchtasida gol urishni uddasidan chiqmagan.

Italiya – Shveytsariya 3:0 (1:0, 2:0)

16 iyun, 00.00, «Stadio Olimpiko»

Gollar:1:0 – 26 Lokatelli, 2:0 – 52 Lokatelli, 3:0 – 89 Immobile.

Italiya – Donnarumma, Kellini (Acherbi, 24), Di Lorentso, Bonuchchi, Spinatstsola, Barella (Kristante, 87), Jorjino, Insine (Keza, 69), Lokatelli (Pessina, 86), Berardi (Toloi, 70), Immobile.

Shveytsariya – Zommer, Mbabu (Vidmer, 58), Sher (Tsuber, 57), Elvedi, Rodriges, Djaka, Froyler (Sou, 84), Shakiri (Vargas, 76), Akandji, Embolo, Seferovich (Gavranovich, 46).

Ogohlantirishlar: Gavranovich (49), Embolo (79).

------------

Uels terma jamoasi Aaron Remzi hamda Konnor Robertsning gollari evaziga Turkiya terma jamoasin mag'lub etib uch ochkoga ega bo'ldi. O'yinning 61-daqiqasida penaltidan unumli foydalana olmagan Garet Beyl ikkala golga ham assistentlik qildi va bahsning eng yaxshi futbolchisi deya e'tirof etildi.

Uels bosh murabbiyi Rob Peyj: Bundan ortiq faxrlana olmayman. Jamoangda Daniel Jeyms, Aaron Remzi, Garet Beyl, Kiffer Mur kabi sifatli futbolchilar bo'lsa, istalgan raqibga muammo yaratish mumkin. Garet uchrashuvda xarakter ko'rsatdi. Hamma xato qiladi. Penaltidan gol ura olmagan bo'lsa ham o'zini qo'lga oldi va uchrashuvning eng yaxshi futbolchisi bo'ldi.

Turkiya ustozi Shenol Gunesh: Uels o'yinni yaxshi boshladi. Keyin biz o'z ritmimizni topdik va muvozanatni ushladik. Juda ko'p imkoniyatlarga ega bo'ldik, ammo hisobni tenglashtira olmadik.

Turkiya – Uels 0:2 (0:1, 0:1)

16 iyun, 21.00, «Olimpik stadioni», Boku.

Gollar: 0:1 – 42 Remzi, 0:2 – 90 Roberts.

Turkiya – Chaqir, Chelik, Ayxan, Seyundju, Merash (Myuldyur, 73), Yokushlu (Demiral, 46), Under (Kaxvedji, 83), Tufan (Yaziidji, 46), Chalxanoglu, Karaman (Dervishoglu, 75), Yilmaz.

Uels – Uord, Roberts, Mifem, Rodon, Devis, Allen (Ampadu, 73), Jeyms (Uilyams, 90), Morrell, Remzi (Uilson, 85), Beyl, Mur.

Ogohlantirishlar: Devis (90), Yilmaz (90), Mifem (90), Chalxanoglu (90).

Mazkur guruhda 3-tur 20 iyun kuni o'tkaziladi. Unda Italiya (6 ochko) Uels (4 ochko) bilan to'qnash keladi. Shveytsariya (1 ochko) esa Turkiyaga (0 ochko) qarshi bahs olib boradi.

???????? Top of the table and into the Round of 16. Italy ????????????#EURO2020

— UEFA EURO 2020 (@EURO2020) June 16, 2021 Manba: www.stadion.uz.