EChL va Evropa ligasida kim qancha daromad topdi?

Ko'pchilikni qiziqtiradigan masala - «Chelsi» ChL-2020|2021dagi yakuniy g'alaba ortidan qancha pul ishladi? Bu safar evrofutbol bosh turniri finalining «Angliya derbisi»ga aylangani o'z yo'liga, «Manchester Siti» va «Chelsi» o'rtasidagi o'yin ba'zilarni uncha qiziqtirmagani ham ahamiyatsiz. Muhimi, London va Manchester jamoalari mavsum hisobidan o'zaro 4-to'qnashuvda bor imkoniyatlarni ishga soldi. ChL finaligacha «Chelsi» «shaharliklar»ni ikki bora mag'lublik ko'chasiga kiritgandi - avval APLda, keyin Angliya kubogi yarim finalida. «Siti» esa «ko'klar»ni bir bora taslim etgandi. Umuman olganda, mavsum yakuni bo'yicha «Chelsi» va «Manchester Siti» o'rtasidagi o'zaro hisob-kitobda London jamoasi ustunligi yanada oshdi - «aristokratlar» 69ta g'alabaga egalar, «shaharliklar» esa ularni 58 bora engishgan.

Mana, «Chelsi» birov kutmagan holda, ChL-2020|2021 g'olibiga aylandi. Finalda Kay Xaverts tomonidan urilgan yagona gol nafaqat «shalpangquloq» kubok taqdirini hal qildi, balki mukofot jamg'armasi taqsimotiga ham ma'lum darajada ta'sir ko'rsatdi. UEFA finaldan ko'p o'tmay, ChLning 2020|2021 yillar mavsumi bonuslari taqsimoti haqida ma'lumot berishni paysalga solmadi. Eslatish kerak, mukofot jamg'armasi oldindan belgilab qo'yilgan formula asosida taqsimladi. Ya'ni har bir bosqich uchun alohida bonus bor. Deylik, musobaqaning guruh bosqichiga chiqqan har bir klub 15,25 million evro miqdorida mukofot puli oladi. «Pley-off» bosqichlari uchun ham alohida summa belgilangan. Yakunda jamg'arilgan summaga ChL televidenie huquqlarini sotishdan tushgan mablag' taqsimoti ulushi ham qo'shiladi. Ma'lum qilinishicha, bu hissa Angliyaning top-klublari uchun 20 million evroni tashkil etadi.

Shuningdek, guruh bosqichidagi har bir g'alaba  va durangga ham alohida bonus borligini unutmaslik kerak. Gap kichik summa haqida ketayotgani yo'q - ishtirokchi o'z kvartetidagi 1ta g'alaba ortidan 2,7 million evro oladi. Durang natijaning bahosi esa - 900 ming. Shulardan kelib chiqib ham, «Chelsi»ning umumiy ulushini hisoblash mumkin. Demak, London klubi guruh bosqichida 14 ochko to'pladi - 4ta g'alaba va 2ta durang. Bu «Chelsi»ga kvartetdan 1-o'rin orqali chiqish imkonini berdi.

Endi «Chelsi»ning ChL-2020|2021dan qancha topganini hisoblaymiz:

Guruh bosqichidagi ishtirok uchun - 15,25 million evro

Guruh bosqichida to'plangan ochkolar bonusi - 12,6 million evro (2,7x4 + 0,9x2)

1|8 finalga chiqish bonusi - 9,5 million evro

1|4 finalga chiqish bonusi - 10,5 million evro

1|2 finalga chiqish bonusi - 12 million evro

Finalga chiqish bonusi - 15 million evro

ChL finalidagi g'alaba bonusi - 4 million evro

Jami summa: 74,85 million evro + 20 million evro (telehuquqlar ulushi)

G'alaba bonusisiz jami daromad 74,85 million evro edi. Demak, «Chelsi» «Dragau»da umumiy summani 78,85 million evroga oshirdi. Bunga televidenie huquqlari sotuvi ulushini qo'shsak, umumiy summaning 100 million evroga yaqinlashgani oydinlashadi. Aytish kerak, «Chelsi»ning daromadi «Manchester Siti»niki darajasida. Nega? Gap shundaki, Xosep Gvardiola jamoasi guruh bosqichida ko'proq ishladi.

Yana bir tomoni bor - «Chelsi» finalga barcha musobaqalar hisobidan oxirgi 5ta uchrashuvda 3ta mag'lubiyat qayd etgan holda kirishdi. Aniqroq aytsak, Tomas Tuxel jamoasi Angliya kubogi finalida «Lester»ga yutqazdi, qolaversa, APL turnir jadvalida 4-o'ringa tushib qoldi. Bu klubning mavsum yakuni bo'yicha umumiy daromadi miqdoriga ta'sir qildi, albatta. Qisqasi, APLdagi 4-o'rin «Chelsi»ga 78 million evro keltirdi - bu «Manchester Siti» ulushidan chamasi ikki baravar kam. «Chelsi» Superliga g'oyasi tarafdorlaridan biri sifatida gavdalangandi. Lekin jamoa birinchilardan bo'lib, yangi ligadan chiqib ketishini rasman ma'lum qildi. Zero, muxlislar stadion oldida katta norozilik namoyishi uyushtirishdi. Ma'lumotlarga qaraganda, «Chelsi» agar Superligaga qo'shilganida, naq 350 million evro olardi. Har holda, loyiha rejasiga ko'ra, shu raqam keltirildi, ammo Superliga atigi 2 kundan so'ng xotima topdi.

**      «Chelsi» bosh murabbiyi Tomas Tuxel avvalgi mavsum «PSJ»da ishlagan va Parij klubi bilan ham ChL finaliga chiqqan, biroq hal qiluvchi bahsda «Bavariya»dan ustun kelish imkoniyatini topolmagandi. O'sha final ham Portugaliyada bo'lib o'tgan, faqat «Dragau» emas, «Eshtadiu da Lush» stadionida.

**         Yakunlangan mavsum «Chelsi» ayollar jamoasi ham ChL finalida o'ynadi va erkaklardan farqli o'laroq, «Barselona»ga bas kelolmadi - 0:4.

 

ChL  finalchisi  «Manchester Siti»ning ulushi

Guruh bosqichidagi ishtirok uchun - 15,25 million evro

Guruh bosqichida to'plangan ochkolar bonusi - 14,4 million evro (2,7x5 + 0,9x2)

1|8 finalga chiqish bonusi - 9,5 million evro

1|4 finalga chiqish bonusi - 10,5 million evro

1|2 finalga chiqish bonusi - 12 million evro

Finalga chiqish bonusi - 15 million evro

Jami summa: 76,65 million evro + 20 million evro (telehuquqlar ulushi)

 

Evropa Ligasida qanday?

Qiziq, EL bosh sovrini sohibi «Vilyarreal» g'aznasiga qancha tushadi? Finalchi «MYu» qancha oladi? Ikki jamoa hal qiluvchi bahsga turli yo'llar bilan bordi va shuning uchun ularning daromadi o'rtasida farq bor.

**      «Vilyarreal» ELga guruh bosqichidan qo'shildi. Bu turnirning asosiy raundidagi ishtirok bahosi - 2,92 million evro. Ispan klubi kvartetda 5ta g'alaba va 1ta durang qayd etdi. Shu tariqa 16 ochko bilan «pley-off»ga chiqqan klub qo'shimcha bonusga ega chiqdi. EL guruhidagi har bir g'alaba «Vilyarreal»ga 570 ming evro keltirgan bo'lsa, durang ortidan 190 ming tushdi. Shu tariqa jamoa guruh bosqichidagi o'yinlar ortidan 3,04 million evro topdi. Bunga «pley-off» yo'llanmasini1-o'rin orqali qo'lga kiritish bonusi - 1 million evro qo'shildi. «Pley-off» bosqichlaring o'zi esa jami 10 million keltirdi. Shunday qilib, «Vilyarreal»ning umumiy ulushi 16,96 million evroga etgandi. Ispaniyaliklar finaldagi g'alaba bilan yana 4 millionga ega chiqishdi. Xullas, EL g'olibining jami ulushi 20,96 million evroni tashkil etdi. Bunga endi telehuquqlar sotuvi ulushi qo'shiladi.

**         «Manchester Yunayted»ga kelsak, jamoa evromavsumni ChL guruh raundida boshladi. Bu turnirdagi ishtirok «qizil iblislar»ga 23,35 million evro keltirdi. Bu summa ichiga ishtirok to'lovi (15,25 milloon) va 3ta g'alaba bonusi (8,1 million) kiradi. Ole-Gunnar Sulsher jamoasining ELdagi ulushi esa 10 million evroni tashkil qildi. Shunday qilib, «MYu» yakunlangan evromavsumda 33,35 million evro topdi (bunga televizion huquqlar sotuvi ulushi qo'shilmagan).

 

EL: mukofot jamg'armasi taqsimoti

Guruh bosqichidagi ishtirok uchun - 2,92 million evro

Guruh bosqichidagi g'alaba bahosi - 570 ming evro

Guruh bosqichidagi durang bahosi - 190 ming evro

1|16 finalga chiqish bonusi - 500 ming evro

1|8 finalga chiqish bonusi - 1,1 million evro

1|4 finalga chiqish bonusi - 1,5 million evro

1|2 finalga chiqish bonusi - 2,4 million evro

Finalga chiqish bonusi - 4,5 million evro

Finaldagi g'alaba bonusi - 4 million evro

J.BOBOXONOV  tayyorladi

Manba: interfutbol.uz