Goran Pandev: «Makedoniya futbol federatsiyasi - g'irrom...»

Shimoliy Makedoniya futbolining bugungi bosh yulduzi Goran Pandev Evro-2020 starti arafasida FourFourTwo jurnaliga intervyu berib, ba'zi holatlardan umuman norozi ekanligini yashirmadi. «Jenoa»da Eldor Shomurodov bilan birga to'p surgan faxriy hujumchiga avvalo, o'z mamlakati futbolidagi keskin vaziyat yoqmayapti. Shunga qaramay, katta futbolda ko'p narsani ko'rishga ulgurgan tajribali ijrochi bo'lajak qit'a birinchiligiga ishonch bilan qaramoqda.

- Goran, mamlakatingiz uchun qit'a chempionatida ishtirok etish nimani anglatadi?

- Hozirning o'zida tarixga kirdik, bu abadiy qoladi. Evropa millatlar ligasi «D» divizioni ishtirokchilaridan biriga qit'a chempionatida qatnashish huquqini berishini eshitganimda, Shimoliy Makedoniya termasi uchun ajoyib imkoniyat yuzaga kelganini tushundim. 5 yilcha muqaddam barchamiz jamlanib, bir-birimizga so'z berdik: «Bunday imkoniyatni qo'ldan chiqarishga aslo haqqimiz yo'q». Jamoamizda tajriba va yosh iqtidorlar uyg'unligi a'lo darajada, ko'plab yigitlarimiz 2017 yili U-21 toifasidagi Evropa chempionatida o'ynashgan. Shuningdek, Igor Angelovskidek malakali murabbiy qo'l ostida shug'ullanyapmiz. U futbolimiz rivojiga katta hissa qo'shmoqda. Angelovski asosan 20 nafar futbolchini saralab olib, 5 yildan buyon ular bilan tinimsiz ishlamoqda. Bu oraliqda asosiy tarkib shakllandi, futbolchilar ijobiy o'zgarishlarni amalga oshirish mumkinligini isbotlashga ahdlashgan chinakam do'stlarga aylanishdi. Qudratimiz - ahillik.

- Yo'llanma tortiq etgan Gruziya termasiga qarshi kechgan final o'yini haqida ozgina gapirib bersangiz.

- Tbilisiga etib borganimizda, stadion oldida 10000dan ko'p gruziyalik muxlislar kutib turishgandi. U erda keskin vaziyat hukmron edi. Chunki gruzinlar ham final bosqichi yo'llanmasidan umidvor bo'lganlar. O'yinning «yopiq eshiklar» ortida o'tkazilgani bizga qo'l keldi. Menimcha, mezbonlardan ishonchliroq harakatlandik. O'zi g'alabaga ishongandik: shunchalik kuchli chog'landikki, yutqazishga haqqimiz yo'q edi. O'yin arafasida jamoadoshlarimga alohida murojaat etganim yodimda: «Yigitlar, bu terma jamoadagi oxirgi uchrashuv bo'lishi mumkin. Iltimos, bunga yo'l qo'ymanglar». Yo'llanma taqdirini hal qilgan gol muallifiga aylanganimdan behad mamnunman. O'sha gol vatanimizga Evropa chempionatida g'alaba qozongan darajada shodlik keltirdi. Eh, qanday kuchli ehtiros... Endi Evro-2020da ham shunday kayfiyatda o'ynashga urinib ko'ramiz, albatta.

- Sizningcha, nufuzli turnirdagi ishtirok Makedoniya futbolidagi vaziyatga ijobiy ta'sir ko'rsatarmikan?

- Muayyan darajada ta'sir etishiga shubha yo'q. Og'ir davrni boshdan kechirgan yurtimizda hali ko'p ishlarni amalga oshirish talab etiladi. Bizga vaziyatni teran his etish va to'g'ri qaror qabul qilish etishmadi, bundan esa ko'pchilik foydalanishga urindi. Deylik, orada terma jamoadagi faoliyatimni 2-3 yilga to'xtatib qo'yishimga to'g'ri keldi. Chunki o'sha payt mavjud sharoitlarga chiday olmadim. Angelovski kelganidan keyingina vaziyat ijobiy tomonga o'zgardi. Hech bo'lmaganda, maydondagi muhit. U meni yo'qlab Genuyaga borganida, samimiy suhbatlashdik. Murabbiyga nuqtai nazarimni ro'y-rost aytdim, u ham ochiq gapirdi. Yakunda meni qaytishga ko'ndirdi, shundan buyon sezilarli siljish kuzatildi. Afsuski, haligacha bor e'tiborni jamlab, futbolga keng ko'lamda ta'sir etish qo'limizdan kelmayapti. Bunda avvalo, bolalar va o'smirlar futbolini nazarda tutyapman. Makedoniyada stadionlar xarobaga aylanmoqda, mashg'ulot bazalari zamon talablaridan ancha yiroq...

- Shimoliy Makedoniya futbol federatsiyasi professionalroq ish yuritishi mumkinmidi?

- Federatsiya hozir sportdan ko'ra, siyosatga yaqinroq tuzilma. Deylik, tashkilotni sport bilan chinakamiga aloqasi yo'q kishilar boshqaryaptilar. Afsuski, bu bema'nilik. Oddiy misol, Evro-2020 saralashidan muvaffaqiyatli o'tganimizdan so'ng rahbariyat belgilangan mukofot pulining ma'lum qismini o'zida olib qoldi. Rahbarlar ham saralash jarayonida ishtirok etgan ekanlar... Bu qanaqasi? Aslida o'sha mablag'ni bolalar maydonchalarini bunyod etish, kerakli uskunalar xarid qilish, yoshlar sektorini rivojlantirish va yigitlarning yaxshi sharoitlarda o'ynashlarini ta'minlashga sarflash lozim edi. Ishoning, yurtimizda iqtidorlar etarli. Biroq ular 15 yoshdan keyin shug'ullanishni shunchaki, to'xtatadilar. Chunki iste'dodlarni qadrlab, ularni boshqaradigan tashkilot yo'q. Evro-2020 - shu kabi kamchiliklarga barham berish uchun ulkan imkoniyat. Undan samarali foydalanishimiz shart.

- Kelajakda Makedoniyaga qaytib, mamlakat futboli rivojiga yanada ko'proq hissa qo'shish rejangiz bormi?

- Ayrimlar futbol federatsiyasi prezidenti bo'lishimni so'rashdi. Lekin buni istamayman, yaxshisi, o'zimga tegishli ishlarni amalga oshiraman. 2010 yili jonajon shahrim - Strumitseda Pandev akademiyasini ochdim. 400 nafar bolaga mo'ljallangan maskanda zamonaviy o'quv markazi, 60 xonali yotoqxona, 2ta sun'iy va 1ta tabiiy chimli maydon bor. Akademiya shuningdek, kiyinish xonalari va mashg'ulot zaliga ega. Birinchi jamoamiz 2 yil avval Makedoniya kubogini qo'lga kiritib, EL saralash bosqichida ishtirok etdi. Shaxsiy jamg'armamdan futbol rivojiga sarmoya ajratdim, ammo tushuning, hozir akademiyani ta'minlash bir o'zimga og'irlik qilyapti.

- Evro-2020 muvaffaqiyatli o'tsa, UEFA kelajakda Evropa millatlar ligasini saqlab qolishi mumkinmi?

- Bu turnir shaxsan o'zimga yoqdi. Adolatparvar musobaqa. Qarang, JCh-2022 saralash turnirida Germaniya va Lixtenshteyn termalari bilan 1ta guruhdamiz. Kimnidir ranjitish fikridan yiroqman, o'zimiz ham shunday maqomdamiz, lekin shunday jamoalarning o'zaro kuch sinashishida qanday ma'no bor? Bu vaqtni behuda o'tkazishdan o'zga narsa emas. Millatlar ligasida esa jamoalar o'z saviyasiga yaqin raqiblarga qarshi maydonga tushadi. Bu qanday natija olib kelishini Shimoliy Makedoniya termasi misolida bilib olamiz. Qit'a chempionatidagi muvaffaqiyatimiz mitti jamoalar tashabbusini qo'llab-quvvatlaydi. Lekin hammasi aksincha tus olishi ham mumkin.

- Xo'sh, Evro-2020dan nimalar kutyapsiz? Shimoliy Makedoniya termasi qaysi jihati bilan muxlislarni lol qoldirishi mumkin?

- Startdagi 2ta uchrashuvni Avst­riya va Ukraina jamoalari bilan o'tkazamiz. Tabiiyki, oson bo'lmaydi. Tushunarliki, startdagi muvaffaqiyat muhim ahamiyatga ega. Asosiysi, o'z salohiyatimizga ishonamiz. Oyoqda dadil tursak, bas. Mart oyida JCh saralashi doirasida Germaniya termasini mahv etganimizdan keyin yurtdoshlarimizda har qanday raqibni enga olishimizga   umid tug'ildi. Balki nemislarga qarshi bahsda salbiy natija qayd etganimiz foydaliroq bo'larmidi (kuladi). Endi raqiblar bizga nisbatan ehtiyotkorroq yondashishlari aniq. Nima bo'lganda ham, o'zimiz va o'yinimizga ishonishimiz kerak.

- Germaniya termasining JCh saralashiga bog'liq 20 yillik mag'lubiyatsiz seriyasiga chek qo'ydinglar. O'sha uchrashuvga qanday baho berasiz?

- Ochig'i, katta xavotir bilan maydonga tushgandik. Bundan oldin ruminlarga qarshi ajoyib o'yin ko'rsatgan bo'lsakda, bir qator qulay vaziyatlardan foydalanolmay, yakunda 2:3 hisobida imkoniyatni boy berdik. Keyin o'z maydonimizda Lixtenshteyn termasi darvozasiga 5ta javobsiz gol urdik. Xullas, nemislarga qarshi bahs hafta davomidagi 3-o'yin edi. Demakki, ancha toliqqandik va kuchli raqibga munosib qarshilik ko'rsatish oson emasligini bilardik. Lekin imkon boricha tayyorlandik, o'yinda esa omadimiz kulib boqdi. Ya'ni tabloda 0:0 hisobi porlab turgan tanaffus arafasida vaziyatdan unumli foydalandik. Keyin oydinlashdiki, raqib ham ancha charchagan ekan. Shu tariqa ikkinchi bo'limda darvozamiz daxlsizligini saqlab qoldik. Yakunda  nemislar g'alaba va mazmunli o'yin bilan tabriklashdi - juda yoqimli holat.

- Terma jamoangizning evrosahnaga chiqqanini 10 yil avval «Inter» bilan ChLda zafar qozonganingizga qiyoslash mumkinmi?

- Ikki quvonchli voqeani o'zaro taqqoslash uncha to'g'ri emas. Lekin «Inter»da tarixiy g'alabaga erishganimni ham hech qachon unutmayman. Axir 45 yillik tanaffusdan keyin klubni yana g'oliblik sari etaklagandik. Esimda, Madriddan qaytganimizda, ko'chalar muxlislar va bayroqlarga to'lgandi. O'shanda Joze Mourino muvaffaqiyatimiz otasi sifatida muhim rol o'ynagani ham rost. Bu tantanalarda oilam a'zolari ishtirok etishmagan, ular Makedoniyada edilar. Endi milliy jamoamiz guruhdan chiqsa, yurtdoshlarim qatori yaqinlarim ham ko'chaga otiladilar - bu aniq.

- Agar qit'a birinchiligida jamoangiz qatori o'zingiz ham muvaffaqiyatli to'p sursangiz, bu faoliyatingizni davom ettirishingizga turtki beradimi? «Jenoa» bosh murabbiyi Davide Ballardini agar nafaqaga chiqsangiz, sizni boplab do'pposlashini aytdi...

- O, u o'ta baquvvat! Demak, doimo hushyor yurishim talab etiladi (kuladi). Jiddiy gapirsam, Evro-2020dan keyin faoliyatimni to'xtatmoqchiman. Bu yog'iga oilam yonida bo'lishni istayman. 3 nafar farzandning otasiman, ammo ularni juda kam ko'raman. To'g'ri, qat'iy to'xtamga kelish juda qiyin, baribir. Ba'zan tunda o'zimga o'zim gapiraman: «20 yil davomida minglab muxlislar qarshisida to'p surding. Endi tribunalar bo'm-bo'sh. Muxlislar bilan yuzma-yuz ko'rishib, xayrlashsang, yomon bo'lmasdi...». Mana, germaniyaliklarni taslim etishni uddaladik. Demak, JCh saralashidan o'tish imkoniyatiga ham egamiz. Ikkinchi tomondan, Avstriyadagi yig'in o'ylantirib qo'yadi, yozning jazirama kunlari jiddiy yumushlar kutmoqda. Ochig'i, nimani xohlashimni o'zim ham bilmayman! Unutmang, hozir 37 yoshdaman.

MUHAMMADSODIQ tayyorladi