Evro-2020. Ochilish bahsi. Mag'lubiyat nimaligini bilmay kelayotgan «skuadra adzurra» Onado'li turklariga qarshi!

Sarlavhadan ham anglashilib turibdiki, bugun milliy g'urur uchun jang bo'lib o'tadi. Shonli tarixga ega bo'lgan turklar o'zlarini Evroda ham bor imkoniyatlari bilan sinab ko'rishga harakat qiladi.

Uchrashuvga doir qiziqarli aspektlar etarlicha. Bugun umuman bir biriga o'xshamagan uslub egalarining o'yinini ko'rarmiz balki. Italiya barchaga ma'lum: pragmatiklikdan biroz ortga chekinayotgan, ichki chempionatiga va shu asnoda milliy terma jamoa uslubiga ham hujumkorlik kirib kelayotgan armiya. Tarkibida «oltin butsa» uchun kurashdan to'xtamaydigan Immobilisi bor kuchli raqib.

Lekin Turkiyachi? Avlodlar almashinuvidan muvaffaqiyatli o'tib borayotgan Gunesh shogirdlari bugun barchaga sirli. Ishonchli o'yinlari ortida turgan aniq qurol nima ekanini hech kim to'liq bilmaydi. Shunday ekan, bugungi o'yin qiziqarli o'tishi uchun turli faktorlar etarlicha.

Bugun muxlislar intiqlik bilan uzoq kutgan Evropa chempionatiga start beriladi. Aslida o'tgan yili bo'lib o'tishi rejalashtirilgan musobaqa endi mana 5 yilga kelib butun dunyo muxlislari diqqat e'tiborini bir erga to'plamoqda.

Bu safargi mundial avvalgilaridan boshqacharoq - turli mamlakat shaharlarida o'tkazilayotgani bilan ham diqqatga molik. Turnirning ochilish bahsi bugun tunda Turkiya hamda Italiya jamoalari o'rtasidagi to'qnashuv bilan boshlanishi rejalashtirilgan. Bugun ushbu uchrashuv haqida qisqacha to'xtalamiz.

Italiya

Bahs Rimdagi mashhur «Olimpiko» o'yingohida bo'lib o'tadi. Nominal mezbon garchi turklar bo'lishiga qaramay bu maqom baribir mantiqiy jihatdan Italiya tarafida bo'lishini barcha his etib turibdi. Turgan gapki, futbolchilarda ko'zga tashlanadigan ishonch uchqunlari «moviy gvardiya»da ko'proq bo'lsa ajab emas. Buni stadionga kiritiladigan 20 mingga yaqin muxlis ham tasdiqlab bersa ajab emas.

Terma jamoalarning bu ergacha etib kelgan yo'li ham turlicha aslida. Turklar Frantsiya joy olgan guruhdan ikkinchi o'rinni egallab ushbu musobaqaga etib kelishgan bo'lsa, Italiya o'z guruhida yaqqol peshqadamlikni qo'lga olganidan xabaringiz bor. Qiziq tomoni, ularning eng yaqin ta'qibchisi Finlandiya bilan o'rtadagi ochkolar farqi 12 ballgacha kengayib ketgandi. Chexiya bilan bo'lib o'tgan so'nggi, o'rtoqlik maqomidagi bahs ham «moviy gvardiya»ning to'liq ustunligi bilan tugagan (4:0). Italiya o'zi o'ynagan oxirgi uchrashuvlarda kamida 2 ta gol urmoqda.

Himoyaning bir me'yorda mustahkamligi bilan bir tempda jamoa ko'pchilikni hayratga solayotgan rekordni ham qayd etib ulgurdi - 27 o'yindan buyon hali «skuadra adzurra»ni taslim eta oladigan jamoa topilmayapti. Buning ustiga ketma-ket 7 o'yinlik g'alabali seriya ham mavjud. Jahon chempionatiga saralash guruhida ham 3 ta o'yin o'tkazgan italyanlar 9 ochko to'plagan holda guruhlarida yaqqol peshqadam bo'lib turibdi. Jamoaning raqib darvozasiga yo'llayotgan gollariga ham asosan A Seriya etakchilari mualliflik qilmoqda. Chexiya bilan bo'lib o'tgan bahsda ham Insine, Barella, Immobili va Berardi yana bir bor katta sahnaga chiqishdi.

Turkiya

Ushbu jamoadan neytral muxlislar bu mundialda katta natijalarni kutishmoqda. Nisbatan «toza» amalga oshirilgan avlodlar almashinuvi va Evropaning kuchli beshlik chempionatlarida javlon urayotgan iste'dod egalari bugungi Turkiyaning ustuniga aylanishgan. Ularning qatoriga A Seriyada o'tgan mavsum eng ko'p vaziyat yaratgan futbolchilardan biri Hakan Chalxanoglu, «Lester» himoya chizig'ida o'tib bo'lmas «qo'rg'on»ga aylangan Chaglar Syoyundjyu hamda «Liverpul»ga mavsum oxirlarida ancha foydasi tekkan Ozan Kabaklarni kiritishimiz mumkin. Shuningdek, «Lill»ni Frantsiya chempioniga aylantirgan Burak Yilmaz va Yusuf Yazijilarni ham bemalol eng muhim figuralardan biri sifatida ko'rsatish mumkin.

Jahon chempionati saralashi doirasida Turkiya ancha muvaffaqiyatli ishtirok etmoqda. To'planishi kerak bo'lgan maksimal 9 ochkodan 7 ball olindi. Gollandiya va Norvegiya singari jamoalar ishonchli hisobda tor-mor etilgan bo'lsa, Latviya bilan kutilmaganda durangga imzo chekildi. O'tkazilgan oxirgi o'rtoqlik bahslarida ham jamoa biror marta mag'lubiyatga uchramadi. To'g'ri bu Italiyaning mustahkam g'alabali seriyasi oldida kichik zarra singari ko'rinishi mumkin, biroq mutaxassislar zamonaviy Turkiyaning imkoniyatlarini ancha yuqori baholayapti, ulardan shonli tarix takrorini kutishmoqda.

Tarkib borasida har ikkala jamoada ham deyarli yo'qotish yo'q. Biroq Italiya safida Lorentso Pellegrini jarohati bois 1-turni o'tkazib yuboradi. Turkiya esa to'liq tarkib bilan ishtirok etadi.

Faktlar:

Turkiya va Italiya o'zaro jami 11 marotaba to'qnash kelishgan. Ularning 8 tasida «skuadra adzurra»ning qo'li baland kelgan bo'lsa, yana 3 bahs durang bilan tugagan. Jamoalarning o'yini 2006 yilda bo'lib o'tgan bo'lib unda 1:1 hisobi qayd etilgan.

- Italiya Evropa chempionatidagi so'nggi 10 ta o'yinining barchasida g'alaba qozongan.

- Italiya Evropa chempionatidagi so'nggi 10 ta bahsda kamida 2 tadan gol urib kelmoqda.

- Turkiya Evropa chempionatlarida so'nggi 6 uchrashuvdan 5 tasida o'z darvozasi daxlsizligini saqlab kelmoqda.

- Italiya o'zi qatnashgan so'nggi 3 uchrashuvning har ikkala bo'limlarida ham g'alaba qozonib  kelmoqda.

- Turkiya ushbu mundialdagi so'nggi 4 o'yinida 2,5 tadan ziyod gol urib kelmoqda.

- Turkiya Evropa chempionatida so'nggi 6 ta uchrashuvda hali mag'lubiyatga uchramagan.

 

Italiyaning JCh saralashidagi holati

Turkiyaning JCh saralashidagi holati

Italiyaning Evropa chempionati kvalifikatsiyasida qayd etgan natijasi

Turkiyaning Evropa chempionati kvalifikatsiyasida qayd etgan natijasi

Yusufbek Saydaliev tayyorladi

Manba: stadion.uz