Oldin qarzni yopish kerak, keyin yangi rejalar tuzing...

Ayrim futbol klublariga 100 so'm bersangiz, shu pulni ishlatib, yilni yana 20 so'm qarz bilan yopgan holatlar bo'lgan.

Pul kam yoki ko'pligi hozir boshqa masala. Asosiy masala — agar bu mushuk bo'lsa, unda go'sht qani? Agar bu go'sht bo'lsa, unda mushuk qani?

Shunga qaramay, klublar keyingi yil uchun yana alohida 100 so'm olishda davom etgan, biroq ishni 20 so'mni yopishdan boshlamagan. U eski yil, eski qarzlar, axir biz yangi yildamiz-ku! Toma-toma ko'l bo'lib, aralashmagan FIFA ham qolmagan, fuqarolik sudlari ham, okalar ham, ukalar ham, xullas, hamma.
Tez orada PFL barcha klublar bo'ynida turgan qarzdorliklarni aniqlab oladi. Kim otelga pulini bermagan, kim medtsentrga, yana kimdir futbolchilarni sarson qilgan va hokazo. Esingizdami, UEFA “Barselona” va “Real” klublariga transfer bozoridagi operatsiyalarini amalga oshirishni taqiqlab qo'ygandi. Endi shu siyosat bizda ham bo'ladi. Ya'ni, klublar avval qarzdorlik masalasini biryoqlik qiladi va undan keyin boshqa ishlarga o'tadi.
Hozir hamma o'z qarzini boricha ko'rsatgani yaxshi, ahvoli ming og'ir bo'lsa ham, imkoniyat beriladi. Biroq boshqa joydan keyinchalik qarz chiqib keladigan bo'lsa, sanktsiya ancha jiddiylashadi. Klublarning kartotekada yurishi, sudma-sud yurishi futbolni rivojlantirmaydi. Oldin shunday mash-mashalardan qutilish va undan keyin porloq yo'l sovxozi sari yo'lga chiqish mantiqliroq...