APL 9 yil deganda ilk bor UEFA koeffitsientlar jadvalida La Ligani ortda qoldiradi

Angliya Premer Ligasi klublari 2020/21 yilgi mavsum Evrokuboklardagi muvaffaqiyatli ishtiroki uchun UEFA koeffitsient reytingida birinchi o'ringa ko'tariladi, deya xabar qilmoqda ESPN nashri.

Shu tariqa, APL La Ligani ortda qoldirgan holda 9 yil degandan ilk bor birinchi o'ringa ko'tariladi.

APL 2007/08 yilgi mavsumdan 2011/12 yilgi mavsumgacha UEFA reytingida birinchi bo'lgan. Ingliz klublari so'nggi besh mavsumning uchtasida ispan jamoalaridan yaxshiroq natija qayd etgan va bu ularga La Liga vakillarini quvib o'tish imkoniyatini berdi.

Bundan tashqari APL bir mavsum davomida to'plangan koeffitsient bo'yicha La Liga rekordini yangilaydi. Sababi APLning uchta klubi Chempionlar Ligasi va Evropa Ligasi finaliga qadar etib bordi.

2015/16 yilgi mavsumda «Real» Chempionlar Ligasida, «Sevilya» esa Evropa Ligasida g'oliblikni qo'lga kiritgandi. O'sha mavsumda Ispaniya 23,928 reyting balli to'plagan. Ingliz klublari joriy mavsum ushbu ko'rsatkichni qayd etib bo'ldi. Evrokubok finallaridan keyin rekord yangilanadi.

Eslatib o'tamiz, EChL finalida «Manchester Siti» va «Chelsi» o'zaro bahs yuritadi. Evropa Ligasi finalida esa «Manchester Yunayted» «Vilyarreal» bilan o'ynaydi.