Piter Xyuistra: "G'alabaga haqli edik, ammo raqib posboni ajoyib o'yin o'tkazdi"

"Turon" bilan bahsdan so'ng "Paxtakor" bosh murabbiyi o'yin xususida fikrlarini bildirdi.

- "Turon"ga ajoyib o'yin uchun rahmat aytaman. Ular juda yaxshi stadion va maydonga ega. Shunday yangi jamoalari ko'paygani ma'qul. Infratuzilmasiga katta e'tibor qaratayotgan klublarning ko'payishi Superliga uchun foydali bo'ladi. O'yinga to'xtaladigan bo'lsam, birinchi bo'limda tashabbus tomonimizda bo'ldi. Ko'plab vaziyatlar yaratdik va hakam tomonidan belgilangan penaltidan so'ng hisobda oldinga chiqib oldik. Tanaffusdan so'ng bo'shashganimiz bois futbolchilar bir nechta xatolarga yo'l qo'yishdi. Mana shu xatolar hisobning tenglashishiga olib keldi. Ushbu goldan so'ng mezbonlar yanada qo'shimcha kuch olib oldinga intilishdi. "Turon" bugun maydonning har bir qarichi uchun kurashganini aytib o'tishim kerak. Darvozamizdan to'p olib chiqqanimizga qaramay, keyingi daqiqalarda xotirjam o'yinni nazorat qildik. Raqib darvozaboni ham yaxshi o'yin namoyish qildi. G'alabaga haqli edik.

Chempionlar Ligasida qisqa vaqtda oltita o'yin o'tkazganimiz jismoniy holatimizga ta'sir qildi, deb o'ylamayman. Buni bahona sifatida keltirmoqchi emasman. Biz har doimgidek o'z o'yinimizni ko'rsatdik. Bugun kim tayyor bo'lsa, o'sha futbolchilarni maydonga tushirdik. Zaxiradan maydonga tushgan futbolchilar ham o'yinni kuchaytirishdi. Bir necha yaqqol golli vaziyatlarimizda raqib posboni o'zini ko'rsatdi. Muxlislar tinmay qo'llab-quvvatlab hakamga ham bosim o'tkaza olishdi.

Mavsum boshida barcha o'yinlarda g'alaba qozondik. OChL guruh bosqichida esa bitta o'yinda mag'lubiyatga uchradik. Oxirgi yillardagi va bu mavsumdagi "Paxtakor" o'rtasida farq bor. Tarkibni etakchilar tark etishdi. Moliyaviy jihatdan oldingidek emasmiz. Shu bois ko'proq yoshlar bilan ishlab, ularning darajasini ko'tarishga harakat qilamiz. Bu menga yoqadi. "Paxtakor"da juda yaxshi akademiya bor. Ular Chempionlar Ligasida ham o'zlarining sifatlarini ko'rsata olishdi.