"Paxtakor" klubi 82,7 milliard so'mlik zarar bo'yicha bayonot berdi

Davlat aktivlarini boshqarish agentligi 2020 yil yakuni bo'yicha moliyaviy hisobotlar tahlili bo'yicha ma'lumotda «Paxtakor» futbol klubini eng ko'p zarar ko'rgan 10 korxona tarkibiga kiritdi.

Unda «Paxtakor» futbol klubining 82,7 milliard so'm miqdorida zarar ko'rgani qayd etilgan. «Paxtakor» futbol klubi ushbu ma'lumot bo'yicha bayonot berib, davlat byudjetidan mablag' olmaganini ma'lum qildi.

«Paxtakor futbol klubi» MChJ O'zbekiston Respublikasi Prezidentining 2017 yil 21 avgustdagi 3227-sonli «Paxtakor» futbol klubining moddiy-texnika bazasini yanada takomillashtirish chora-tadbirlari to'g'risida»gi qaroriga ko'ra, investitsiya shartlarini bajargan holatda 80 foiz ulushi «SFI Management Group» MChJga o'tishi va klubning ustav fondidagi 20 foiz ulushini Toshkent shahar hokimligida saqlab qolish to'g'risidagi taklif ma'qullangan. Shu vaqtdan buyon «Paxtakor» futbol klubi byudjeti to'lig'icha «SFI Management Group» MChJ tomonidan shakllantirib kelingan. «Paxtakor» futbol klubi o'tgan yillar mobaynida davlat byudjetidan umuman mablag' olmaganligini ma'lum qilamiz. 

Davlat aktivlarini boshqarish agentligi tarqatish uchun tayyorlagan ma'lumotlarining to'g'ri va xolis ekani bo'yicha majburiyatga egaligini unutmasligi lozim», - deyiladi klub xabarida.

Ma'lumot uchun, amaldagi chempion «Paxtakor» Superligada 15 ochko bilan peshqadamlik qilayotgan bo'lsa, OChL guruh bosqichida muvaffaqiyatsiz ishtirok etib, pley-off bosqichiga chiqa olmadi.