Arteta: "Agar g'alaba qozonsak, kubokka ancha yaqinlashamiz"

«Arsenal» bosh murabbiyi Mikel Arteta Evropa Ligasi yarimfinalidan o'rin olgan «Vilyarreal»ga qarshi javob bahsi oldidan o'z fikrlarini bildirib o'tdi.

«O'zimizni barcha mish-mishlardan, klub atrofidagi voqealardan yiroq tutishimiz kerak. Bahsga e'tibor qaratishimiz zarur, chunki klubga yordam berishning eng yaxshi yo'li – o'yinlarda g'alaba qozonish va eng yuqori darajada raqobatlashish.

Bu – klub uchun eng muhim o'yin. Agar g'alaba qozonsak, kubokka ancha yaqinlashamiz. G'alabalar har doim kelajakka yordam beradi. Hamma narsaga tayyor bo'lishimiz kerak», – deya Artetaning so'zlarini keltiradi Sky Sports.

«Arsenal» – «Vilyarreal» o'yini bugun, 6 may kuni bo'lib o'tadi. Dastlabki bellashuvda Ispaniya klubi 2:1 hisobida g'alaba qozongan.