Bugun Superliga doirasida yana 3 o'yin o'tkaziladi

Bugun O'zbekiston Superligasi 7-tur bahslari davom ettiriladi. Kun davomida milliy chempionat muxlislari 3 ta uchrashuvni tomosha qilish imkoniga ega.

“Mash'al” o'z maydonida “Lokomotiv”ni qabul qiladi. Vodiy derbisida “Andijon” va “Qo'qon-1912” jamoalari o'zaro kuch sinashadi. Har ikki o'yin 17:00 da boshlanadi.

Kunning so'nggi qarama-qarshiligi Bekobodda “Metallurg” hamda “So'g'diyona” jamoalari o'rtasida kechadi. Ushbu bahs 19:00 da start olishi belgilangan.

Ma'lumot uchun “Paxtakor” 5 o'yindan so'ng 15 ochko bilan birinchi, “So'g'diyona” esa 6 o'yinda 12 ochko to'plagan holda ikkinchi o'rinda boryapti.