Mahrez finalga chiqqandan so'ng, o'z fikrlari bilan o'rtoqlashdi

"Manchester Siti" yarim himoyachisi Riyad Mahrez Chempionlar Ligasi yarim final javob uchrashuvida "PSJ"ni mag'lubiyatga (2:0) uchratganidan so'ng, qarshi hujumlarda o'ynash rejasi yo'qligini ta'kidladi.

"Juda yaxshi o'yin. Shunga qaramay, biz uni odatdagiday boshlay olmadik: birinchi bo'limni yaxshi o'tkazmadik, ammo biz gol urdik va o'zimizni yanada qulay his qildik.

Ikkinchi bo'limni yaxshi o'ynadik va ko'proq gol urishimiz mumkin edi. Qizil kartochkadan so'ng ular tinchlanib qolishdi. Qarshi hujumda o'ynash rejamizda bor edi deb ayta olmayman. Ammo raqib oldinga intilayotganda, ikkita golimiz aynan qarshi hujumlarda urildi.

Bizni shanba kuni navbatdagi o'yin kutib turibdi va chempionlikni ta'minlash uchun bizga g'alaba kerak. Keyin esa bor e'tiborimizni Chempionlar Ligasi finaliga tayyorgarlik ko'rishga qaratamiz", - deya Mahrezning so'zlarini keltirgan UEFA matbuot xizmati.